Keshe, 29 qyrkúıek kúni ejelgi grek jerinde aldaǵy jyldyń aqpan aıynyń 7-sinde Reseıdiń Sochı qalasynda bastalatyn XXII qysqy Olımpııalyq oıyndardyń alaýy tutandy. Endi osy otty shyǵyrshyqty alyp júretin estafeta úsh aıdan astam ýaqyt jer-dúnıeniń biraz jerin sharlap kelip, Qara teńizdiń jaǵasyndaǵy qalaǵa Oıyndardyń saltanatty ashylatyn kúni kelip jetedi.
Erteden kele jatqan ańyzdarǵa sáıkes, otty tutatý rásimi bizdiń zamanymyzǵa deıingi VIII ǵasyrda alǵashqy dánegi ónip shyqqan Olımpııalyq oıyndar mekeni – Olımpııa taýyndaǵy Geranyń Hramynyń qırandysy eteginde kerýen kerdi. Burynnan qalyptasqan úrdis boıynsha, teatrlandyrylǵan qoıylym oınalyp bitkennen keıin, abyz qyz Protıerıa bolyp oınaǵan afınalyq boıjetken parabolıkalyq aınanyń kómegimen kún sáýlesinen alynǵan qyzý arqyly olımpııalyq alaýdy tutatty.
Osydan keıin otty tuǵyrdy birinshi bolyp grektiń 18 jasar shańǵyshysy Iаnnıs Antonıý aldy. Ol birshama ýaqyt júgirip ótkennen keıin ony hokkeıden Reseı quramasynyń múshesi Aleksandr Ovechkınniń qolyna ustatty.
Bul estafeta endi bes kún boıy Grekııa qalalary aýmaǵynan júrip ótedi. Alaý sodan soń, 5 qazan kúni «Sochı-2014» uıymdastyrý komıtetiniń delegasııasyna tapsyrylyp, ushaqpen Máskeýge jetkiziledi. Al 7 qazannan bastap alaýdyń uzyn-yrǵasy 123 kúnge sozylatyn reseılik marafony bastalady. Onyń sońy 7 aqpan kúni Sochıge kelip taban tireýmen aıaqtalady.
Budan buryn Olımpıadany uıymdastyrýshylar ottyń qaı jerlerde bolatynyn da aıtyp ótken edi. Tarıhtaǵy eń uzaq estafeta – 2,9 myń shaqyrymdyq jol Kalınıngrad pen Vladıvostoktyń arasyn jalǵaıdy. Olımpıadanyń basty rámizin alyp júrýge barlyǵy 14 myń alaýshy qatysady.
Olımpııa alaýy jolaı Týla oblysyndaǵy «Iаsnaıa Polıana», Novgorod jerindegi «Rıýrıkter qalashyǵy» arheologııalyq eskertkishter aýmaǵy men Tıýmen ólkesindegi Tobyl Kremli sekildi tarıhı tanymal mekenderge arnaıy aıaldap ótedi. Otty shyǵyrshyq sondaı-aq Karelııadaǵy ataqty «Kıjı» murajaı-qoryǵy men Reseıdiń Plesesk ǵarysh aılaǵynda da bolady.
Alaý kóliktiń alýan túrli quraldarymen de alyp ótiledi. Ol aerostatpen aýaǵa kóterilip, onymen birge aspaly joldyń boıymen quldyraıdy. Ony orystyń úsh at jekken tarantasy da alyp júredi.
Rýslan Igilik.