Qazaqstanda resmı túrde tótenshe jaǵdaı tártibi aıaqtaldy. Buǵan qaramastan, koronavırýs ınfeksııasynyń taralýyn boldyrmaý úshin kóptegen aımaqta karantın sharalary jalǵasýda. «Azamattarǵa arnalǵan úkimet» korporasııasy halyqqa qyzmet kórsetý ortalyqtaryna halyqtyń ıin tiresip jınalýyna jol bermeý úshin, ıaǵnı vırýstyń juǵý qaýpin azaıtý maqsatynda birqatar naqty shara qabyldady.
Jurtshylyq HQO-da elektrondy formatta alý qarastyrylmaǵan, «qaǵaz» júzindegi qyzmetterdi ǵana ala alady. Bul shamamen 100 memlekettik qyzmet, olardy alý úshin mekemege barýǵa týra keledi. Sondaı-aq egov.kz portaly arqyly onlaın túrde rásimdelgen qyzmetterdiń daıyn nátıjesin alýǵa bolady. Ortalyqqa barý úshin aldyn ala kezekti brondaý mindetti.
Aıta ketý kerek, ózgerister tek Nur-Sultan, Almaty jáne Shymkent qalalary men oblys ortalyqtarynda ornalasqan HQO-larǵa qatysty. Aýdan ortalyqtarynda jáne aýyldy eldi mekenderde ornalasqan mekemeler burynǵydaı jumys isteı beredi.
Kezekke tapsyrys berý kerek
Halyqqa qyzmet kórsetý ortalyǵyna bararda kezek ýaqytyna tapsyrys berý úshin egov.kz elektrondy úkimet portalyn, eGovKzBot 2.0 telegram-botyn paıdalanýǵa nemese 1414 nómirine qońyraý shalýǵa bolady. Bron qyzmet alýshynyń JSN-in tirkeý arqyly jasalady. Eger baratyn ýaqytyn aldyn ala belgilemese, kezekti sol jerde brondaýǵa bolady. Alaıda qabyldaý dál sol ýaqytta bolatynyna kepildik berilmeıdi.
egov.kz portalynda qoljetimdi barlyq memlekettik qyzmettiń 80%-dan astamyn qazaqstandyqtar úıinde otyryp ala alady. Ol úshin elektrondy sıfrly qoltańbasy bolsa bolǵany. ESQ-ny da portaldan alý múmkindigi bar.
Keıbir qyzmetterdi ESQ-syz, bir rettik qupııasózdiń kómegimen de alýǵa múmkindik jasalǵan. Ol úshin mobıldi azamattar bazasynda tirkelý qajet. Qyzmetterdi onlaın alý boıynsha suraq týyndasa, 1414 nomerine nemese portaldaǵy vırtýaldy assıstentke habarlasqan jón.
Beıneqońyraý bar
Azamattarǵa arnalǵan úkimet operatorlary qazaqstandyqtarǵa egov.kz portalyndaǵy beıne qońyraý arqyly tikeleı keńes bere alady. Ol úshin paraqshanyń oń jaq tómengi buryshyndaǵy «Vırtýaldy assıstent» batyrmasyn basyp, ashylǵan terezeden beınekameranyń belgisin tańdaısyz.
Sonymen qatar kompıýteri nemese ınternetke shyǵý múmkindigi joq azamattar úshin HQO ǵımarattarynan bólek, 328 ózine ózi qyzmet kórsetý buryshy ashyldy. Olar aýdandyq ákimdikterdiń ǵımarattarynda, oqý oryndarynda, medısına uıymdarynda, saýda oıyn-saýyq ortalyqtarynda jáne basqa da nysandarda ornalasqan. Aldaǵy ýaqytta mundaı buryshtar sany kóbeıedi. Úsh sanattaǵy azamattar – zeınetkerler, kópbalaly otbasylar, múmkindigi shekteýli azamattar elektrondy qyzmetterdi HQO-nyń jeńildik terezesi arqyly ala alady.
20 mamyrdan bastap aımaqtyq shtabtardyń ruqsatymen 10 óńirdegi HQO mekemeleri tolyǵymen jumys isteıdi bastaǵanyn aıta keteıik. Bular: Nur-Sultan qalasy men Aqmola, Aqtóbe, Almaty, Qaraǵandy, Qostanaı, Qyzylorda, Túrkistan, Soltústik Qazaqstan jáne Pavlodar oblystary. Al Almaty, Shymkent, Atyraý jáne Shyǵys Qazaqstan oblystarynda HQO tek bıznes ókilderine qyzmet kórsetedi. Jambyl oblysyndaǵy ortalyqtar jabyq.