Memleket basshysy Qasym-Jomart Toqaev Parlamentte qabyldanǵan saılaý týraly jáne saıası partııalar týraly zańdarǵa qol qoıdy.
Bul zańdarda Prezıdenttiń Ulttyq qoǵamdyq senim keńesinde aıtqan usynystary arnaıy normalar retinde qamtyldy. Sonyń ishinde partııalyq saılaý tizimderinde áıelder men jastar úshin keminde 30 paıyzdyq kvotany engizý bastamasyn erekshe atap óter edim. Ásirese osy qadam arqyly jastardyń saıası belsendiligi arta túsedi dep úmittenemin. О́ıtkeni qaı kezde de, qaı salada da jalyndaǵan jastarǵa barynsha múmkindik berip, olardyń el isine aralasýyna jol ashý kerek ekeni udaıy aıtylyp keledi. Men de mundaı ilkimdi bastamalardy iske asyrýdy qashanda qoldap júremin.
О́zim jetekshilik etetin «Qazaqstan Team» respýblıkalyq qoǵamdyq jastar birlestigi elimizdiń birneshe óńirin aralap, jer-jerdegi jastarmen kóptegen kezdesý ótkizdi. Sondaı sátterde jastardyń jaqsy ıdeıalary bar ekenin, biraz nárseni ózgertkisi keletinin, eldiń bolashaǵyna beıjaı qaramaıtynyn baıqadyq. Bizdiń ozyq oıly, bilimdi, talapty jastarymyz barshylyq. Sondyqtan eldiń sózi aıtylatyn minberlerden jastardyń da úni estilýi kerek.
Demokratııaǵa qaraı qarqyndy qadam jasalyp jatqan kezeńde jastar elimizdiń qoǵamdyq-saıası ómirin jandandyra túsýge óz úlesin qosa alady. Saılaý kezinde partııalar tiziminde jastardyń naqty úlesin mindetteý arqyly olardyń saıası belsendiligi kúsheıe túsetini anyq. Buǵan qosa jańa partııalardy tirkeýdiń de talaptary jeńildetildi. Aldaǵy ýaqytta jastardyń saıası ómirde úlken kúshke aınalatynyna senemin. Qazaqtyń «Asyl – tastan, aqyl – jastan» degen dana sózi bar ǵoı. Sondyqtan jastardyń utymdy usynystary arqyly da biraz upaıymyzdy túgendeýge bolady.
Ashat SADYRBAI,
Ulttyq qoǵamdyq senim keńesiniń múshesi, «Qazaqstan Team» respýblıkalyq qoǵamdyq jastar birlestiginiń jetekshisi