Qazaqstanda aǵymdaǵy jylǵy qańtar-sáýir aılarynda 113 myń otbasydan 586 myńǵa jýyq adamǵa jalpy somasy 19,6 mlrd teńgege ataýly áleýmettik kómek taǵaıyndaldy jáne tólendi.
Eńbek jáne halyqty áleýmettik qorǵaý mınıstrliginiń málimetinshe, 586 myń adamnyń 561 myńy TJ kezinde memlekettik ınstansııalarǵa júginbeı, II toqsanda AÁK-ti avtomatty túrde alǵan. Onyń ishinde 25 myń adam AÁK alý úshin alǵash ret júgingen.
«Járdemaqy eń aldymen quramy, turǵylyqty mekenjaıy jáne tabys deńgeıi ózgermegen otbasylarǵa taǵaıyndaldy. Ol úshin aqparattyq júıelerden alýshylardyń derekterin tekserý júzege asyryldy, atap aıtqanda, turǵylyqty jeri boıynsha tirkelýi, jyljymaıtyn múlkiniń, kóliginiń bolýy, kiristeri jáne basqasy tekserildi. Barlyq aqparat, sondaı-aq habarlamalar, elektrondy poshta jáne messendjerler arqyly jiberildi. AÁK kórsetýdiń jańa tetikteri sheńberinde tabysy az otbasylardaǵy balalardy qoldaýǵa erekshe kóńil bólinedi. Kepildik berilgen áleýmettik toptama jas sanattary boıynsha 2 túrge bólinedi: 1-den 6 jasqa deıingi jáne 6-dan 18 jasqa deıingi balalarǵa arnalǵan. 1 jastan 6 jasqa deıingi balalar úshin azyq-túlik jáne turmystyq hımııa zattarynyń jıyntyǵy qarastyrylǵan», deıdi mınıstrlik ókilderi.
Azyq-túlik jıyntyǵyna túrli jarma, shyryndar, sút jáne t.b. kiredi. Turmystyq hımııa jınaǵy tis pastasy, balaǵa arnalǵan shetkany, kir jýatyn untaqty, sharýashylyq jáne ıis sabyndy jáne t.b. qamtıdy, ol toqsanyna 1 ret usynylady. Sonymen qatar, 6 jastan 18 jasqa deıingi balalarǵa mektepte tegin tamaq beriledi, qoǵamdyq kólikte oqý ornyna deıin jeńildikpen júredi, mektep formasymen jáne mektep kerek-jaraqtarymen jylyna 1 ret qamtamasyz etiledi.