Teatrdyń kıeli sahnasyn qadir tutqan, qazaq ónerin shyrqaý bıikke kótergen tarlandar az emes. Solardyń bir toby – KSRO halyq ártisteri Sábıra Maıqanova men Hadısha Bókeevanyń, Qazaq KSR halyq ártisi Nurmuhan Jantórın men Qazaqstannyń Eńbek Eri, KSRO halyq ártisi Asanáli Áshimovtiń kompozısııalyq beıneleri Mahambet atyndaǵy akademııalyq qazaq drama teatrynyń aldynda tur.
Teatr dırektory Berik Jámenovtiń aıtýynsha, ashyq alańdaǵy kompozısııa «Shyǵarmashylyq áńgime» dep atalady. Bul kompozısııany jasaýǵa almatylyq músinshi Gúlfııa Meldesh tańdalypty.
– Biz halyq ártisteriniń atyn el esinde saqtaýymyz qajet. О́ıtkeni, olar – otandyq kınematografııa men teatr óneriniń bastaýynda turǵan qaıtalanbas tulǵalar. Olardy aǵa býyn jaqsy biledi. Alaıda keıingi býyn úshin olardyń eńbegi tarıhqa aınalyp barady, – deıdi Berik Jámenov.
Al Atyraý qalalyq mádenıet jáne tilderdi damytý bóliminiń basshysy Aqylbek Amanbaıulynyń málim etýine qaraǵanda, teatr aldyndaǵy tarlandardyń qatary taǵy bir top óner men rýhanııat maıtalmandarynyń beınesimen tolyǵady. Aldaǵy ýaqytta Qazaq KSR-niń halyq ártisi atanǵan Qýat Tólekov, Alma Ahmetova, Zarıfa Súleımenova, Jupar Manapova, Qazaqstannyń eńbek sińirgen artısteri Tólegen Qýanyshev, Qurmanǵalı Doǵalaqov, Kúnıpa Imanǵalıeva, Ońaı Jaqsybaev, Qazaqstannyń eńbek sińirgen qaıratkerleri Chapaı Zulhash pen Narıman Úlkenbaıuly, Rahymjan Otarbaev sekildi ult rýhanııatyna ólsheýsiz eńbek sińirgen tulǵalardyń oıǵa shomǵan eskertkishteri qoıylady.
ATYRAÝ