Karantın kezinde qoǵamdyq birlestikter men qaıyrymdylyq qorlarynyń belsendiligi arta tústi. Áleýmet áleýetin jaqsartýǵa «Qyzyl Jarty aı» qoǵamy da atsalysýda.
Olar jaǵdaıy tómen otbasylarǵa, sondaı-aq aýrýhanalarda jatqan naýqastarǵa azyq-túlik sebetterin taratýda. Halyqaralyq «Qyzyl jarty aı» qoǵamdyq qorynyń Kókshetaýdaǵy uıymy tótenshe jaǵdaı ýaqytynda erekshe belsendilik tanytýda. Karantın talaptary jeńildetilgenimen, olardyń jumysy toqtaǵan joq. Búgingi kúnge deıin 300-ge jýyq otbasyn azyq-túlik sebetterimen qamtamasyz etti.
– Germanııanyń «Qyzyl jarty aı» uıymy áleýmettik kómek kórsetýde. Kókshetaý qalasyndaǵy jaǵdaıy tómen otbasylarǵa 100 jáshik azyq-túlik bólindi. Buǵan deıin 180 otbasyǵa kómek kórsetken bolatynbyz. Bizdiń qatarymyzǵa Kókshetaý qalasynyń avtoklýb júrgizýshileri de qosyldy. Olar azyq-túlikterdi jetkizýge kómektesip júr, – deıdi «Qyzyl jarty aı» qoǵamy Kókshetaý fılıalynyń jetekshisi Ashat Ýáıisov.
«Qyzyl jarty aı» qoǵamynyń volonterlary aldaǵy ýaqytta Qytaıdyń qaıyrymdylyq qorlarynan da 100-den astam azyq-túlik sebetin qabyldap almaq. Bul uıym qıyndyqqa tap bolǵan jandarǵa da qol ushyn sozýda. Úıinen órt shyǵyp, baspanasyz qalǵan Aımuhanovtar otbasyna kómek kórsetti. Qazir olar garajda turyp jatyr.
«Qyzyl jarty aı» qoǵamy Aımuhanovtar otbasyna qomaqty járdem kórsetýde. Azyq-túlik, ydys-aıaq, kıim-keshekpen qamtamasyz etti.