Mańǵystaý oblystyq Sybaılas jemqorlyqqa qarsy qyzmet departamentiniń áleýmettik jelilerdegi resmı paraqshalarynda «Jańa baǵdarlamamen baspanaly bolý múmkindikteri» tikeleı efırde aıtylyp, oblys turǵyndarynyń baspanaǵa qatysty suraqtaryna mamandar jaýap berdi, dep habarlaıdy Mańǵystaý oblystyq Sybaılas jemqorlyqqa qarsy qyzmet departamenti baspaóz qyzmeti.
«Antikor.live» jobasynyń aıasynda uıymdastyrylǵan tikeleı efırge turǵyn úı qurylys jınaq bankiniń aǵa keńesshisi Qymbat Azımbaeva, bıznesti damytý bóliminiń mamany Aıdyn Ajenov qatysty.
Efırde Qymbat Bolatqyzy turǵyn úı qurylys jınaq bankinen esepshot ashý, aı saıyn shotty tolyqtyrý men ony tóleýdiń joldary týraly aqparat berdi. Sondaı-aq, Aıdyn Amıradınuly «5-10-20» jáne «Baqytty otbasy», «О́z úıim» baǵdarlamalarynyń aıyrmashylyqtary týraly aıtyp, baspanaly bolýdyń múmkindikterine keńinen toqtaldy.
Bir saǵatqa sozylǵan tikeleı efırde turǵyndar tarapynan 50-ge jýyq suraq kelip tústi. Basym kópshiligi «Baqytty otbasyna» qatysý, tómen paıyzben baspana alý, alǵashqy jarna týraly saýaldar boldy.
Mamandar baspanaǵa qatysty azamattardyń kez kelgen suraqtaryna banktiń áleýmettik jelilerdegi resmı paraqshalarynda jaýap beretinderin jetkizdi.