Sáýir aıynyń sońynda Taldyqorǵan qalasyndaǵy oblystyq perınataldy ortalyqta úshem dúnıe esigin ashqan edi.
Eskeldi aýdanyndaǵy Nurmolda Aldabergenov atyndaǵy aýylda turatyn Imanǵabylovtar áýletine ulan-asyr qýanysh syılaǵan eki ul men bir qyz bir aı boıyna dárigerler baqylaýynda boldy.
- Týǵanda eki uldyń salmaǵy 1 kılo 800 gramm jáne qyz 2 keli edi. Perzenthanada 500 gramm salmaq qosqansha ustadyq. Endi tıisti saqtyq sharalaryn jasap, úshemdi úıine shyǵaryp saldyq. Balalar kesar tiligi arqyly dúnıege keldi. Perzenthanada bir aı boıyna úshemder men anasynyń densaýlyǵyn qatań baqylaýǵa aldyq. О́ıtkeni, náresteler ýaqytynan buryn dúnıge kelgendikten kez kelgen ýaqytta qıyndyq týýy múmkin boldy. Qazir úshemniń densaýlyǵy jaqsy, jaǵdaılary qalypty, - deıdi Taldyqorǵandaǵy perzenthana dırektory Qanat Jumashev.
Úshemniń anasy Marjan Imanǵabylova Aldabergenov aýylyndaǵy orta mektepte aǵylshyn tilinen sabaq beredi eken. Buǵan deıin eki balany dúnıege ákelgen ol endi kópbalaly ana atandy. Al úshemderdiń densaýlyǵy Eskeldi aýdandyq ortalyq aýrýhanasynyń nazarynda bolmaq.
- Úshemderdiń kútimine aýyldaǵy medısına qyzmetkerleri kómek kórsetedi. Ýchaskelik dáriger balalardyń densaýlyǵyn baqylaýda ustaıdy. Sonymen qatar úshemderdi balalarǵa arnalǵan tamaqpen qamtamasyz etetin bolamyz, - dedi aýdandyq aýrýhananyń bas dárigeri Roza Ibraeva.
Aıtpaqshy, bıyldyqqa Almaty oblysynda ekinshi ret úshemderdiń kindigi kesildi. Jaqynda Jambyl aýdanynda jas ana úshemdi dúnıege ákelgen bolatyn.