Ár ata-anaǵa baýyr eti-balasynan kóz jazyp qalý ońaı deısiz be? Desek te, oblystyq polısııa departamenti baspasóz qyzmetiniń habarlaýynsha, 1-25 mamyr aralyǵynda «102» nómerine jasóspirimderdiń joǵalý faktisine baılanysty 20-ǵa jýyq habar túsipti.
– Osy kezeńde 3-8 jas aralyǵyndaǵy sábılerdiń joǵalýy boıynsha 7 fakti, 8-14 jastaǵy balalarǵa qatysty 5, al, 15-17 jastaǵylarǵa qatysty 5 fakti tirkeldi. Balalardyń barlyǵy derlik aman-esen tabyldy. Tek 20 mamyrda «Juldyz» yqsham aýdanyndaǵy úıinen shyǵyp ketip, joǵalǵan 1,5 jasar sábıdi aman-esen tabý múmkin bolmady, - dep habarlady departamenttiń baspasóz qyzmeti.
Atyraý qalalyq polısııa basqarmasy qyzmetkerleriniń aıtýynsha, habar-osharsyz ketetin jasóspirimder negizinen 2-3 saǵatta tabylady eken. Kóbinese, kishkentaı sábıler úı mańynda oınap júrip, basqa kóshege ketip qalady. Sóıtip, olar óz úıin taba almaı, adasyp ketedi. Keıde joǵalǵan balanyń ata-anasy polısııaǵa júginýge asyqpaı, ózderi izdeıdi. Balany taba almaǵan soń ǵana polısııaǵa habar beredi.
– Eresekterdiń qaraýynsyz júrgen balalardyń jol kólik oqıǵalaryna túsip qalý jaıttary da joq emes.Tek mamyr aıynda balalardyń qatysýymen 3 jol-kólik oqıǵasy tirkeldi. Qaladaǵy I.Taımanov kóshesindegi saýda úıleriniń biriniń tusynda ornalasqan jaıaý júrginshi belgisi tusynan ótip bara jatqan 2016 jyly týǵan jasóspirimdi, T.Amandosov kóshesindegi kolledj mańynda 2004 jyly týǵan jasóspirimdi, Geolog yqshamaýdanynda 2015 jyly týǵan jasóspirimdi jol boıynda kólik qaǵyp, saldarynan bir jasóspirim jaraqat aldy. Qalǵan ekeýi jaraqatsyz úıine jetkizildi, - dedi baspasóz qyzmetinen.
Tártip saqshylary jasóspirimderdiń qaýipsizdigi úshin qaterli jaǵdaılardyń aldyn alý, boldyrmaý maqsatynda ata-analar úshin túrli jadynamalar taratyp, profılaktıkalyq áńgimelesýler ótkizip júr.
– Oınap júrip, ózderiniń turǵylyqty jerinen uzap, keıin adasyp qalatyndardyń deni – 2 men 6 jas aralyǵyndaǵy sábıler. Buǵan balaǵa jaýapty (baǵýshy,kútýshi, sábıdiń ózinen úlken aǵa-apasy) eresekterdiń balalardy kózden tasada qaldyrýy sebep bolyp otyr, - deıdi polısııa qyzmetkerleri.