Qazaqstan Respýblıkasynda dinı ekstremızm men terrorızmge qarsy is-qımyl jónindegi 2013 – 2017 jyldarǵa arnalǵan memlekettik baǵdarlama týraly
Qazaqstan Respýblıkasynda dinı ekstremızm men terrorızmge qarsy is-qımyl jónindegi 2013 – 2017 jyldarǵa arnalǵan memlekettik baǵdarlama týraly
Qaýly etemin:
1. Qazaqstan Respýblıkasynda dinı ekstremızm men terrorızmge qarsy is-qımyl jónindegi 2013 – 2017 jyldarǵa arnalǵan memlekettik baǵdarlama (budan ári – Baǵdarlama) bekitilsin.
2. Qazaqstan Respýblıkasynyń Úkimeti:
1) bir aı merzimde Qazaqstan Respýblıkasy Prezıdentiniń Ákimshiligimen kelisim boıynsha Baǵdarlamany iske asyrý jónindegi is-sharalar josparyn ázirlesin jáne bekitsin;
2) «Qazaqstan Respýblıkasyndaǵy memlekettik josparlaý júıesiniń odan ári jumys isteýiniń keıbir máseleleri týraly» Qazaqstan Respýblıkasy Prezıdentiniń 2010 jylǵy 4 naýryzdaǵy № 931 Jarlyǵynda belgilengen merzimderde jáne tártippen Baǵdarlamanyń oryndalý barysy týraly Qazaqstan Respýblıkasy Prezıdentiniń Ákimshiligine aqparat usynsyn.
3. Ortalyq jáne jergilikti atqarýshy organdar, sondaı-aq Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdar Baǵdarlamany iske asyrý jóninde sharalar qabyldasyn.
4. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.
5. Osy Jarlyq qol qoıylǵan kúninen bastap qoldanysqa engiziledi.
Qazaqstan Respýblıkasynyń Prezıdenti N.NAZARBAEV.
Astana, Aqorda, 2013 jylǵy
24 qyrkúıek. № 648.
Qazaqstan Respýblıkasy Prezıdentiniń 2013 jylǵy 24 qyrkúıektegi № 648 Jarlyǵymen bekitilgen «Qazaqstan Respýblıkasynda dinı ekstremızm men terrorızmge qarsy is-qımyl jónindegi 2013-2017 jyldarǵa arnalǵan memlekettik baǵdarlamaǵa»
TÚSINIK BERÝ
Memleket basshysynyń 2013 jylǵy 24 qyrkúıektegi № 648 Jarlyǵymen Qazaqstan Respýblıkasynda dinı ekstremızm men terrorızmge qarsy is-qımyl jónindegi 2013-2017 jyldarǵa arnalǵan memlekettik baǵdarlama bekitildi.
Memlekettik baǵdarlama Memleket basshysynyń 2012 jylǵy 14 jeltoqsandaǵy «Qazaqstan-2050» Strategııasy – qalyptasqan memlekettiń jańa saıası baǵyty» atty Qazaqstan halqyna Joldaýynda aıtylǵan tapsyrmaǵa sáıkes ázirlengen.
Baǵdarlamanyń negizgi maqsaty dinı ekstremızm kórinisteriniń aldyn alý jáne terrorızm qaterlerine jol bermeý arqyly adamnyń, qoǵamnyń jáne memlekettiń qaýipsizdigin qamtamasyz etý bolyp tabylady.
Bul maqsatqa qol jetkizý dinı ekstremızm jáne terrorızm profılaktıkasy sharalaryn jetildirýmen, atalǵan kórinisterdi anyqtaý men jolyn kesýdiń tıimdiligin arttyrýmen, sondaı-aq, ekstremıstik jáne terrorıstik áreketterdiń saldarlaryn azaıtý jáne joıý sharalary júıesin jetildirýmen qamtamasyz etiledi.
Bul rette baǵdarlamada profılaktıkalyq jumys pen nysanaly toptar arasyndaǵy aqparattyq-nasıhat jumysyn jańǵyrtýǵa jurtshylyqty keńinen tartýǵa basa nazar aýdarylǵan.
Baǵdarlamada kózdelgen profılaktıkalyq is-sharalardyń kópshiligi alǵashqy ret iske asyrylatyn bolady jáne el turǵyndarynyń belsendi azamattyq ustanymyna súıenedi, ol saıyp kelgende qoǵamda tolerantty dinı sanany jáne radıkaldy ıdeologııaǵa degen ımmýnıtetti kúsheıtýge múmkindik beredi.
Tutastaı alǵanda, Memlekettik baǵdarlamanyń iske asyrylýy dinı ekstremızm men terrorızmge qarsy is-qımyldyń jalpymemlekettik júıesin nyǵaıtýǵa múmkindik beredi.
Qazaqstan Respýblıkasy
Qaýipsizdik Keńesiniń hatshylyǵy.