Baqyttyń berik bosaǵasy

Máńgi baqı qolarbaǵa tańylǵan tir­shi­liktiń nesi baqyt dersiz. Qudaı-aý, mynaý jaryq dúnıede jer basyp júrgenge ne jetsin?! Baqyt degen sol emes pe? Án­sheıinde adamdar osylaı oılaýy da múm­kin. Al shyn máninde qulaı súıgen kó­ńildiń ottan ystyq sezimin, alaýlaǵan jan nuryn eshkim de, eshteńe de sóndire al­maıdy eken.

Oń jaq qaptaldaǵy qabyrǵa usaq-usaq tastarmen jymdasa kómkerilipti. Onyń arǵy jaǵyndaǵy as bólme de biz kór­megen bedermen bezendirilgen. Al qonaq bólme alýan túrli beınelerge, kórkemsýretterge, ártúrli keıipte som­dalǵan zattarǵa tolyp tur. Myna bire­ýi «Qaısar áıel» dep atalady eken. Qos janary ushqyn atyp, almadaı aq júzi alaýlaı janyp, et júrektiń lúpili tóńiregine tań nuryndaı shýaq shashyp turǵan, tal shybyqtaı buralǵan boıjetkenniń eki qoly baılaýly. Sirá, taǵdyrdyń tálkegin meńzegen tuspaly shyǵar. Eki qolyn taǵdyr tas qylyp baılasa da, erkindikte, azat, bostan kúıinde. Tipti sál ǵana umsyna umtylyp, qanat baılap qııal kógine ushyp ketkeli turǵan tárizdi. Sýretshi Márzııa Muhanbetjanovanyń óz ómirin, taǵdyryn beınelegen týyn­dysy. Sol týyndydaǵy astarly oı ómirdiń ózinen oıyp turyp oryn alǵandaı. Iá, sum taǵdyr ómirge ǵashyq adamnyń jolyna kese-kóldeneń jatyp, gúl kóńilin soldyrǵysy kelgenimen, ómirge, jaryna, perzentterine degen aq adal mahabbaty boı bermegen. Boı bergenińiz ne, boıyndaǵy qushtarlyǵyn, ińkárligin eselep arttyra túsken.

Oblys ortalyǵynyń irgesindegi Zerendi aýdanynyń Kýropatkıno aýy­lynda dúnıe esigin ashqan Márzııa kishkentaı kezinen tym-tym qııalshyl edi. О́zge jan túsinip-túısine bermeıtin qyzyldy-jasyldy qyzyqqa toly óziniń ádemi álemi bar. Sol álemdi elegizı kezip júredi. Keıbir sátterde sulý da syrly, tosyn da tylsym beıneler kezigedi. Álgi beınelermen syr shertisip, kózin toıdyryp, kóńilin toǵaıtqan sátte bálkim sýret kúıinde, bálkim áldebir materıaldardan qalyptaǵan zat keıpinde aınytpaı túsire qoıady.

Keıipkerimizdiń boıyndaǵy sheber­lik­ti sanap kórelikshi. Márzııa – sýretshi, músinshi, tiginshi, qolóner sheberi. Mine, osylaısha jalǵasyp kete beredi. О́tpeli kezeńniń ókpek jeli shyǵarmashylyqtan qol úzdirgen sátte jan jary ekeýi pá­ter­lerdi, kottedjderdi bezendirýge kósh­ti. Jumys bastan asyp jatatyn. Keı kottedjderdi qona jatyp, jyldap árledi. Qyrsyq 2013 jyly qyryna aldy. Joǵaryda, tóbeni árlep jatqan Már­zııa baıqaýsyzda aıaǵy taıyp ketip qu­laǵany. Qas qylǵandaı kóldeneń jat­qan bóreneniń ústine túsken eken. Beı­ne­lep aıtqanda, qaýyrsyndaı ǵana qyz bolǵanymen, salmaqtyń aty salmaq. Omyrtqasy synǵan. Odan sońǵysy aýrýhananyń tósegine tańylý, sansyz ota, juqarǵan júıke, selkeý túsken senim. Bir sát esin jınaǵan. Joq, bylaı tym ońaı berilýge bolmaıdy, tirshiligi úshin kúresýi kerek. Jambastap jata berse, jarynyń kúni ne bolmaq, shıetteı balalary júdep qalmaı ma? Áldebir qudiret qos qoltyǵynan kóterip demegen tárizdi. О́zi de alǵa umtyldy. Birte-birte shaǵyn jattyǵýlardy jasaýdy úırendi. Jastyqtan basyn kótergen soń súıikti isi – qolónermen shuǵyldana bastady. Perde tikti, kóılek pishti, sándik áshekeı zattardy árledi. Júzin, álde muńyn jasyrdy ma eken, kóbin dostary men tilektesterine tegin taratty. Shabytpen jasalǵan dúnıesin satyp kórgen emes. Al tapsyryspen istelgen jumys, árıne, óz eńbegi.

– Bir ádemi dúnıemdi ejelgi tanysqa, áıtpese bir kórgen adamǵa syılaǵan kezde júzinen qýanysh tabyn kórsem, sol maǵan jetip jatyr, – deıdi qolóner sheberi, – adamǵa odan artyq ne kerek?

Aýrýhana tóseginde tańylyp jatqan­da-aq aldaǵy ómir órnekteri toǵysatyn taǵdyr jolyn qutty baǵdarlamalyq qalypqa syıǵyzyp, josparlap alǵan. Qazir sol baǵdarlama boıynsha jumysqa berilgeni sonshalyqty, birer mınýt bos otyrsa, eki qolyn aldyna syıǵyza almaıtyny bar.

Áńgimelesip otyryp uqqanymyz, Márzııa­nyń kórkemóner tarapynan bili­mi joq eken. Áıtse de, tylsym tabıǵat talant dep atalatyn qudiretti súıegine sińirgen. Jyl saıyn oblystyq «Aqmola juldyzdary» halyq shyǵarmashylyǵy kórmesine qatysyp, júldeli orynǵa ıe bolýy sheberdiń boıyndaǵy tabıǵı darynnyń laıyqty baǵalanýy der edik. Bir qyzyǵy, kórmeden soń kóz maıyn taýysyp jasaǵan ne bir ádemi, ózi úshin de, ózge úshin de qymbat dúnıelerin tegin taratyp jiberedi eken. Joǵaryda aıtqanyndaı, adamdarǵa tıtimdeı bolsa da qýanysh syılaý úshin.

О́zi úsh jyl tósek tartyp jatqan kez­de kúıeýi Igor da qurylysta apatqa ushy­rap, múgedekter arbasyna tańyldy. Dál osy sátte kóńildiń appaq kúnniń nu­ryndaı ádemi sátin kireýkelengen tuman basqandaı dúnıeniń júzi talaýraı qara­ýytyp ketti. Endigi kúni ne bolmaq? Bu­rynǵy burynǵy ma, shyn synaq endi bastalǵandaı. Bir otbasyndaǵy eki birdeı adam múgedekter arbasyna ta­ńyl­sa, jópsheńdi adam ómirden baz keshkendeı qasiret emes pe?!

Mynaý jaryq dúnıede eń qudiretti kúsh et júrektiń enshisinde eken. Sana da soǵan baılaýly. Júrek táýbe degen, jaratqannyń bergenine shúkir. Bor­ke­mik bolsa bordaı tozyp keter edi, al, bular biriniń arbasyn biri súıretip jú­rip, birin-biri demep júrip taǵdyrdyń sal­ǵan isine kóngenimen, úmit atty qudi­ret­tiń shyńyraýdyń eń bir tereńinen tal­maý­syraǵan maıshamnyń jaryǵyndaı jal­qyn sáýlege júrekterin jylytqan. Bir-birin ólerdeı jaqsy kórgen, bir-birin máńgilik súıgen mahabbattyń qaıt­pas qaısar rýhqa qýat bergen alapat kú­shimen.

Qazir tórt qyzy, toǵyz nemeresi jaz gúlindeı jaınap ósip keledi. Aldy er jetip, óz órisin tapty. Ata-ananyń boıyn­daǵy qasıeti juqqany kenjesi. Ol da sý­ret salady, músin jasaıdy.

Kip-kishkentaı páterde on eki múshesi saý adamdardyń keıbiri ómirge ókpe aıtyp, qaraqan basyn jarylqaı almaı júrgende, múgedekter arbasyna ta­ńylǵan qos muńlyqtyń shańyraǵyn ba­qyt bosaǵasy dep aıtsaq, nesi artyq. Ta­bal­dy­ryǵyna tózimdilik uıalap, shańy­ra­ǵyna senim baılanǵan álgi páterden shyqqan soń kópke deıin óz-ózimizge kele almaı, ańtarylyp turdyq. Adam rýhy net­ken kúshti edi! Pende bitkenniń boıynda bir-birine degen osyndaı sezim, osyndaı iltıpat bolsa ǵoı...

Aqmola oblysy