Petropavlda bir kúnniń ishinde karantındik sharalardyń 19 buzýshylyǵy anyqtaldy. Ol kásipkerlerdiń karantındik shekteýlerdi saqtaýyn polıseılerdiń tekserý reıdiniń barysynda belgili boldy.
Reıdter Petropavl qalalyq taýarlar men qyzmetterdiń sapasy men qaýipsizdigin baqylaý basqarmasy mamandarymen birge júrgiziledi. Basty nazarǵa jolaýshylar kóligi, saýda oryndary alynǵan edi. Júrgizilgen 46 tekseristiń jartysynda túrli buzýshylyqtar anyqtaldy.
Eń jıi kezdesetini – betperde kımeı júrý boldy. Máselen, jeti avtobýs júrgizýshisi betperde taǵý rejimin buzǵan. Taǵy bir júrgizýshide jolaýshylardan jol aqysyn alǵan kezde asa qajet qolǵap pen sanıtaızer bolmaı shyqty. Sondaı-aq, tekserýshiler úı astyndaǵy dúkenderdiń kireberisinde zararsyzdandyrylmaı, qurǵap jatqan kilemshelerdi anyqtady. Kóp jaǵdaıda satýshylardyń betperdeni tıisti talappen taqpaıtyny nemese betperdesiz júretini belgili boldy. Dúkenderdiń birinde kezek kútip turǵan adamdar jınalyp qalǵan, bul rette dúkenniń ishinde keminde eki adam bolýy tıis, qalǵandary áleýmettik araqashyqty saqtap, syrtta turýy kerek edi. «Tótenshe jaǵdaı rejimi toqtatylǵanyna qaramastan, oblysta karantındik shekteýler kúshin joıǵan joq», - deıdi PD bastyǵy, polısııa polkovnıgi Marat Tólebaev.
Onyń aıtýynsha, oblystyń geografııalyq ornalasýyn eskere otyryp, juqtyrýdyń jańa oshaqtary áli de bolýy múmkin. О́ńirdiń qaýipsizdigi birinshi kezekte, turǵyndardyń shekteýlerge qanshalyqty jaýapkershilikpen qaraýyna baılanysty. Birlesken reıdtik is-sharalar aldaǵy ýaqytta da jalǵasady. Onyń maqsaty – karantın jaǵdaıyndaǵy júrip-turý mádenıetin qalyptastyrý bolyp tabylady.
Reıd barysynda jınalǵan materıaldar Ákimshilik quqyq buzýshylyq kodeksiniń 462-baby boıynsha shara qoldaný úshin Taýarlar men kórsetiletin qyzmetterdiń sapasy men qaýipsizdigin baqylaý komıtetine tapsyryldy.
PETROPAVL