Prezıdent janyndaǵy OKQ-da ótken brıfıngte Aýyl sharýashylyǵy mınıstrliginiń ókili Qazaqstandaǵy shegirtkelerdiń taralýyna qarsy júrgizilip jatqan jumystar jaıynda aqparat berdi. Bul týraly mınıstrliktiń baspasóz qyzmeti habarlady.
Búgingi tańda navıgatorlar, GPS trekerleri men planshetterin qoldanatyn arnaıy qyzmetter 3 mln gektarǵa jýyq jerdi zerttep, Jambyl jáne Túrkistan oblystarynda 150 myń gektar jerdegi marokko shegirtkelerin tapty. Qazirgi ýaqytta bul aımaqtarda hımııalyq óńdeý jumystary aıaqtalýǵa jaqyn.
Italııalyq prýs shegirtkeleri Almaty, Jambyl, Qaraǵandy jáne Pavlodar oblystarynyń 93 myń gektar jerin jaılaǵan. Qazir atalǵan alqaptardy qorǵaý sharalary bastaldy.
Spıker Respýblıkalyq fıtosanıtarlyq dıagnostıka jáne boljamdaý ortalyǵynyń málimetine súıene otyryp, osy jyly elimizde 800 myń gektar jerge shegirtkelerdiń taralý qaýpi bar ekenin atap ótti.
Shegirtkemen kúresýge 1,5 mlrd-tan astam qarjy bólindi. Bul qarajatqa hımııalyq óńdeý men pestısıdter satyp alyndy.
Jumys nátıjeli bolý úshin túrli preparattar alyndy. Emdeýge 148 arnaıy búrikkish qural-jabdyqtar, onyń ishinde 20 ushaq jáne ýltradybystyq ushaqtar tartyldy. О́ńirlerde oblys ákimdikterimen birlesip jedel shtabtar quryldy, baqylaý jáne hımııalyq óńdeý boıynsha jumys josparlary bekitildi.
«Jalpy alǵanda, shegirtke oshaqtaryn anyqtaý úshin 38 mln gektardan astam jerge zertteý jumystary júrgizildi. Aldaǵy ýaqytta kórshi elder sarapshylarynyń qatysýymen birlesken jumystar atqaramyz. Qazaqstan, Reseı, Qytaı jáne О́zbekstannyń aýyl sharýashylyǵy mınıstrlikteri arasynda kelisim bar», - dedi Alamabek Mars.
Afrıka kontınentiniń qazirgi ýaqytta shegirtkelerden zardap shegip otyrǵandyǵyn atap ótti. Sondaı-aq, Aýǵanstan, Pákistan, Úndistan jáne basqa da Azııa elderinde zııankes jándikterdiń sany kóbeıgen.