27-28 mamyr aralaǵynda Halyqaralyq Túrki akademııasy Túrkitaný kafedralar keńesiniń jıynyn ótkizdi. Bul týraly akademııanyń baspasóz qyzmeti habarlady.
Onlaın formatta ótken jıynǵa Ázerbaıjan, Qazaqstan, Qyrǵyzstan, О́zbekstan, Túrkııa jáne Majarstan, Mońǵolııa, sonymen qatar Altaı, Bashqurtstan, Tatarstan Respýblıkalarynyń (RF) joǵarǵy oqý oryndaryndaǵy túrkologııa kafedralary men ortalyqtarynyń meńgerýshileri, professorlary, Til bilimi ınstıtýttarynyń basshylary qatysty.
Túrki tildes elderi arasynda tuńǵysh ret ótken shara barysynda qazirgi oqý prosesindegi túrkologııa salasynyń máseleleri talqylandy.
Akademııa basshysy Darhan Qydyráliniń moderatorlyǵymen ótken jıynnyń alǵashqy kúninde mamandar Túrkitaný kafedralarynyń qazirgi jaǵdaıy, problemalary men jetistikteri týraly pikir almasty. Ár tarap óz elderindegi ahýaldardy baıandap berdi.
Basqosýdyń ekinshi kúninde qatysýshylardyń ózara yntymaqtastyq ornatý múmkindikteri, túrki tildes elder joǵarǵy oqý oryndarynyń oqytýshylary men bilim alýshylary arasynda tájirıbe almasý, oqý prosesindegi ortaq standarttardy qarastyrý, stýdentterge shákirtaqy taǵaıyndaý, túlekterdiń jumysqa ornalasýy týraly sóz qozǵaldy.
Eki kúnge sozylǵan keńes otyrysynyń basty taqyryby elder arasyndaǵy túrkolog mamandardyń qarym-qatynasyn arttyrý boldy. Osy oraıda, mamandar túrkologııany tek lıngvıstıkalyq baǵytpen shektemeı, órisin keńeıtý týraly da pikir almasty. Sondaı-aq, SCOPUS málimetter bazasyna enetin halyqaralyq deńgeıdegi jýrnaldar shyǵarý, sandyq tehnologııanyń mol múmkindikterin paıdalaný arqyly qashyqtan oqytý, elektrondy jýrnaldar men kitaptar shyǵarýdy qolǵa alý máseleleri qarastyryldy. Ortaq oqý baǵdarlamalaryn da jasaqtaý jóninde oılar talqylandy.
Alqaly jıynnyń qorytyndysy boıynsha taraptar túrkologııadaǵy mańyzdy máselerge baılanysty ortaq ǵylymı jobalardy iske asyrý, turaqty túrde onlaın semınarlar men dárister ótkizýge ýaǵdalasty. Sonymen qatar, bilim alýshy jas stýdentterge jazǵy lager túrindegi tájirıbe almasý dástúrin qolǵa alyp, birlesip uıymdastyrýǵa qatysty usynystar aıtyldy. Mamandardyń ortaǵa salǵan oılary Akademııa tarapynan Ǵylymı keńes otyrystarynda bilim jáne ǵylym mınıstrlerine jetkiziletin bolady.
Aıta ketý kerek, 2020 jyldyń qańtarynda bilim jáne ǵylym mınıstrleriniń qatysýymen ótken Halyqaralyq Túrki akademııasynyń Ǵylymı keńesiniń úshinshi otyrysynda joǵarǵy oqý oryndardaǵy Túrkitaný kafedralarynyń bilim salasyndaǵy qyzmetterin úılestirý jumystaryn bastaý týraly sheshim qabyldanǵan edi.