Shymkent qalasynyń ákimi M.Áıtenovtiń tóraǵalyq etýimen qala aýmaǵy boıynsha jer ýchaskelerin memleket muqtajyna qaıtarý boıynsha jıyn ótti. Onda jer qatynastary basqarmasynyń basshysy B.Áshirbekov nysandardyń qurylysyn júrgizý úshin memleketke 2448 jer ýchaskesi boıynsha qaýly shyǵarylǵanyn atap ótti.
«Atalǵan nysandarǵa aǵymdaǵy jyly 3,7 mlrd teńge qarajat qarastyrylǵan. Memleket muqtajy úshin ıelikten shyǵarylatyn jer ýchaskesiniń, sondaı-aq jer ýchaskesinde ornalasqan jyljymaıtyn múliktiń quny, olardyń naryqtyq quny mólsherinde aıqyndalady. Búgingi tańda alańy 17,3 gektardy quraıtyn 152 jer ýchaskesin qaıtarýǵa 1 mlrd 458 mln teńge jumsalǵan»,- dedi basqarma basshysy.
Onyń aıtýynsha, aǵymdaǵy jyldyń bes aıynda turǵyn úıler qurylysy men jol qurylysyna, jańa termınal men juqpaly aýrýhanaǵa jáne mektep pen jasyl aımaq qurý syndy 11 nysannyń qurylysy úshin memleket muqtajyna qarastyrylǵan jer ýchaskeleri tolyqtaı qaıtarylǵan.
Qala basshysy birinshi kezekte áleýmettik mańyzy bar nysandar úshin qajetti jer telimderin qaıtarýdy tapsyrdy.
«Josparlanǵan qurylystyń sozylýyna alyp keletin máseleniń biri menshik ıeleriniń baǵalanǵan múliktiń qunyna kelispeıtindigi. Sondyqtan qunyn aıqyndaýda menshik ıesiniń quqyǵy qorǵalyp, naryqtaǵy qunmen ótelýi tıis. Sonymen qatar, qalada júzege asyrylyp jatqan jobalardyń mańyzdylyǵy týraly turǵyndarǵa durys túsindirý qajet»,- dedi M.Áıtenov.
Eske salsaq, ótken jyly 199 jer ýchaskesine 2 mlrd 301 mln teńge qarajat bólinip, 61,8 ga jer memleketke qaıtarylǵan.
Shymkent