Qyzyljar qalasynyń ortalyǵy qazir kórkine kóz tartqandaı bolyp jaınap turady. Aınalanyń bári tap-taza, jylan jalaǵandaı bir muqııattyq, jap-jasyl, alqyzyl gúlder jaınaǵan ıranbaǵy sekildi.
Bul – abattandyrý men tazalyqty saqtaýǵa jergilikti polısııanyń aralasýynyń arqasy dep aıtýǵa bolady. Buryn polısııany tek tártipti saqtaýshy, qylmysty quryqtaýshy dep qana bilip, olardy tazalyq saqtaý isine tartýǵa eshkim mán bermeıtin. Sóıtsek, tazalyqtyń ózi tártippen tikeleı baılanysty eken ǵoı. Jergilikti polısııa qyzmeti ashylǵannan beri tazalyq pen tártip qosa qadaǵalanyp, ortaq jeńiske jol ashyp tur.
Jyly mezgil bastalǵannan beri Soltústik Qazaqstan oblystyq jergilikti polısııasy abattandyrý erejelerin buzǵany, tazalyqty saqtamaǵany úshin 31 adamǵa aıyppul saldy. Qyzyljarda kún saıyn 67 ýchaskelik polısııa ınspektory qyzmet kórsetetin aýmaqtaǵy abattandyrý erejeleriniń saqtalýyn tekseredi. Sonymen qatar, qańtar aıynan bastap qala ákimdigi qyzmetkerlerimen birge 53 maqsatty reıd júrgizildi.
Jeke sektorlar, kóp páterli úılerdiń aýlalary, azamattardyń demalatyn oryndary, saıajaıǵa baratyn joldar tekserildi. «Osyndaı reıdter kezinde jekemenshik úı sharýashylyqtarynan bastap iri kásiporyndarǵa deıingi barlyq menshik ıelerine jadnama-usynystar tapsyrylady», - dedi oblystyq Polısııa departamenti bastyǵynyń birinshi orynbasary, polısııa polkovnıgi Qanat Aıtbaev.
«Halyqqa, jeke kásipkerlerge, uıymdar men kásiporyndardyń basshylaryna irgeles aýmaqtardy sanıtarlyq tazartý qajettiligi týraly aqparat beriledi. Qyzmetkerlerdiń profılaktıkaǵa nazar aýdarýy tapsyryldy. Negizgi jaza - bul eskertý bolyp tabylady. Alaıda, bir jyl ishinde birneshe ret buzýshylyqtar oryn alsa, zańdy túrde jazalaý sharalary qoldanylady», - dedi ol.
Sonymen qatar, polısııa qyzmetkerleri turǵyndar tarapynan túsken habarlamalarǵa da nazar aýdarady. О́tken aptada Instagram áleýmettik jelisinde qala shetindegi qoqys tógilgen aýmaqtardyń beınejazbasy paıda boldy.
Tártip saqshylary osy ýchaskelerden qoqys shyǵarýǵa jaýapty uıymdy dereý anyqtap, Ákimshilik quqyq buzýshylyq týraly kodekstiń «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý» boıynsha ákimshilik hattama toltyrdy.
Qyzyljar