Tutastaı elimizde covid-19 indeti sharyqtaý shegine jetkenimen, keıbir óńirlerde karantın tártibiniń saqtalýy jáne blok-beketterdiń alynbaýy –adamdardyń dala tóskeıine shyǵyp, kókirek-saraılaryn ashýyna kedergi keltirdi. Solaı bola tursa da ótken mamyr aıynyń aıaǵynda arnaıy ruqsat qaǵazben Samara-Shymkent halyqaralyq tas joly arqyly Aqtóbeden Oralǵa deıin avtokólikpen júrip ótýdiń sáti tústi.
О́tken kúz ben qys mezgilderinde jańbyrdyń jaýmaǵany, qardyń da az túskeni, ári topyraq qabattaryna ylǵal ustaýǵa septigi tıetin toń jınalmaǵany atalǵan óńirlerge qurǵaqshylyq qaýpin týǵyzdy. Áıtse de sáýir men mamayr aılarynda halyq arasynda nur dep atalyp ketken jańbyrdyń nóserletip jıi jaýǵany bul qaýiptiń bultyn seıiltip jiberdi.
Sol nur-jańbyrdan keıingi kóktem qyzýy men shýaǵy dalanyń boıyn shıratyp topyraǵyna nár sińirip, ósimdikter men janýarlar dúnıesiniń shyraıyn keltirgeni qandaı ǵanıbet. Aqtóbe qalasy mańyndaǵy Marjanbulaq aýylyn basyp ótip, Qobda aýdanyna qaraı bet túzegen kezimizde joldyń eki jaq qaptalynan bastalyp, kóz jeter jerge deıingi keń jazyqtyqta ótken jyldardaı emes, dala shóbi men gúlderi tutas ári bitik óskenine kýá boldyq.
Osyndaı tańǵajaıyp kórinister Shyńǵyrlaýdyń shuraıly shoqylary men Qaratóbeniń quba bel qyrlaryna jalǵasyp kete beredi. Tek Jympıtyǵa jaqyndaǵan kezde ǵana masaty kilemdeı qulpyrǵan dala reńi sál solǵyn tartyp, osy tas joldyń sol jaq betindegi Jumaǵazy qaziret mazaryna jaqyndaǵan kezde qaıtadan qulpyryp, qoıýlanyp sala beredi.
Osyndaıda qazaq poezııasynyń kórnekti ókili Qadyr-Myrza Áli: jasyl jaılaý, túkti kilem, kók kilem... dep qalaı dál taýyp, beınelep aıtqanyna tań qalmasqa sharań joq. Mamyrdyń maıda jańbyry dala ósimdikterimen kókoraı shalǵyn báısheshektiń sanalýan túrleri bir mezgilde qaýlap ósýine septigin tıgizgeni aıqyn baıqalady. Mundaı kezde tabıǵattyń sheksiz qudireti men tylsym syryna bas ımeý, tipti de múmkin emes ekenin tereńirek túısingendeı kúı keshesiń. Mine, mamyr aıynyń dalamyzǵa tartqan baǵa jetpes syıy osyndaı.
Jasaryp, jaınap túrlene ber darhan dala! Eldik pen erliktiń tý tikken qasıetti tuǵyry, halqymyzdyń anasy men panasyna aınalǵan ulylyq ólshemi. Dala –seniń ulyńmyn dep jyrlaǵan eken ómirden erterek ketip qalǵan halqymyzdyń daryndy aqyndarynyń biri – Jarashan Ábdiráshev. Osy aqıqatqa oqyrmandarymyz da qol qoıa alatynyna senimimiz mol.
Aqtóbe – Oral