Barshanyń qozǵalysyn shektegen karantın Atyraýda 8 maýsymǵa deıin sozylǵan edi. Alaıda, endi karantındi 1 maýsymda saǵat 00:00-de merziminen buryn alyp tastaýǵa uıǵarym jasalyp otyr. Osyǵan oraı oblystyń bas memlekettik sanıtarlyq dárigeri Temirbek Musaǵalıev arnaıy qaýlyǵa qol qoıdy. Ol bul qaýlyǵa qol qoıarda sońǵy jeti kúnde Atyraý oblysynyń turǵyndary arasynda koronavırýs ınfeksııasynyń 7 paıyzdan tómen tirkelýin negizge alypty.
Atalǵan qaýlyǵa sáıkes Atyraý oblysy aýmaǵynda jáne Atyraý qalasynda shekteý sharalary saqtala beredi. Sondaı-aq, Maqat aýdanynyń Maqat poselkesinde, Jylyoı aýdany men Teńiz kenishinde, «Teńizshevroıl» kompanııasynyń vahtalyq poselkelerinde jáne merdiger kompanııalarda epıdemıologııalyq jaǵdaı tolyq turaqtanǵa deıin sozylady.
Dál osy kúni, ıaǵnı 1 maýsymda Atyraý qalasynyń tórt baǵytyna qoıylǵan blok-posttar alynyp tastalady. Al, azamattarǵa áleýmettik qashyqtyqty 1,5-2 metrge deıin saqtap, maskany taǵyp júrý mindettele otyryp, turǵylyqty jerinen shyǵýǵa jáne qozǵalýǵa ruqsat berilip otyr.
Alaıda, aýqymdy dýmandy, sporttyq, ózge de buqaralyq, sonymen birge, otbasylyq, eske alý sharalaryn, sonyń ishinde úıde ótkizýge salynǵan tıym kúshin joıǵan joq. Sondaı-aq, túngi kóńil kóterý oryndarynyń qyzmetine, kalıan, adam kóp shoǵyrlanatyn ózge nysandardyń jumysyna áli de ruqsat berilmedi.