Búgin Qaraǵandy tas jolyndaǵy «Jibek joly» blok-beketinde Nur-Sultannyń Polısııa departamentiniń basshysy Erjan Sádenov vırýspen kúresýde aldynǵy shepte bolyp, onyń taralýyna jol bermeý úshin belsendi jumys istegen dárigerler, polıseıler men volonterlerdi marapattady. Bul týraly qala ákimdiginiń resmı saıty habarlady.
Dárigerler, eriktiler men polıseıler QR IIM mınıstri Erlan Turǵymbaev, elorda ákimi Altaı Kólginov jáne Nur-Sultan qalasynyń Polısııa departamentiniń basshysy Erjan Sádenovtyń atynan gramota jáne alǵys hattarmen marapattaldy.
«Dárigerler, polıseıler men volonterler birigip, indetti jeńip jáne tezirek úırenshikti ómirimizge oralýǵa kómektesti. Polıseıler men eriktilerge eren eńbegi úshin alǵys aıtamyz. Bizdiń azamattarymyzdyń densaýlyǵy sizderdiń jumystaryńyzǵa baılanysty boldy. Sizder naǵyz janashyrlyq pen qamqorlyqtyń jarqyn úlgisi boldyńyzdar», - dedi Erjan Sádenov.
Eriktiler polıseılermen birge reıdter men profılaktıkalyq sharalarǵa qatysyp, túsindirý jumystaryn júrgizdi. Ýchaskelik ınspektorlarmen birge azamattarmen kezdesip, olarǵa qaýipsizdik sharalaryn eske saldy. Dárigerler táýlik boıy adamdardyń ómirin qutqaryp, ınfeksııamen aldynǵy shepte kúresti.
Karantın kezinde naǵyz erliktiń eren úlgisin kórsetken polıseıler az emes. Onyń ishinde blok beketterden júkti áıelderdi alyp perzenthanalarǵa, túrli jaraqattarmen kelgen naýqastardy aýrýhanalarǵa jetkizgen polıseıler bar.
Buǵan qosa, Polısııa departamenti karantın rejımi aıaqtalmady, epıdemııa joıylǵan joq. Sondyqtan maska kıip, sanıtarlyq-epıdemıologııalyq rejımdi qatań saqtaý keregin eskertti.