Shet aýdanyndaǵy Moıynty kentinde jergilikti ákimdiktiń uıymdastyrýymen «Biz birgemiz!» aksııasy aıasynda kópbalaly, jaǵdaıy tómen muqtaj otbasylaryna sol óńirde jumys istep turǵan «Bapy Maınıng» kompanııasy 1 mln 405 myń teńgeniń aqshalaı kómegin kórsetti.
Budan bólek, kenttegi dúken ustaıtyn jeke kásipkerler, atap aıtqanda Qartaıǵan Balabekov, Mınash Áshimova, Klara Ábeýova, Ultýsyn Týrabekova, Qarlyǵash Toqabaeva, Altyn Amanbaeva, «Aıdyn» sharýa qojalyǵynyń basshysy Aınur Týrabekova jáne ákimdik qyzmetkerleri de ortaq iske óz úlesterin qosyp, muqtajdyǵy bar toǵyz otbasyna azyq-túlik sebetterin tabys etti.
Sonymen qatar, aýyl jastary, eriktiler tobynyń bastamasymen iri qara mal soıylyp, onyń eti turmysy tómen otbasylarǵa taratylyp berildi. Buǵan qosa, belsendi top ókilderi jınaǵan 750 myń teńge qarajat pen azyq-túlik sebetteri áleýmettik turǵyda az qamtylǵan otbasylarǵa úlestirildi.
«Bapy Maınıng» kompanııasynyń kenttegi termınalynyń qyzmetkerleri de qaıyrymdylyq is-sharasynan tys qalmaı, aýyldyń bes otbasyna azyq-túlik toly sebetter taratty.
Moıynty kentiniń ákimi Saıahat Týrabekov «Biz birgemiz!» aksııasynyń aıasynda aýyzbirshilik tanytyp, ıgi bastamany shyn nıetpen qoldaǵan aýyl halqynyń uıymshyldyǵyn atap ótti.
«Qazirgi tańda Moıynty kentinde kóshelerdi abattandyrý jáne jaryqtandyrý boıynsha birshama jumystar atqarylýda. Aldaǵy ýaqytta kentte sport alańy salynyp, aýyl jastary arasynda salamatty ómir saltyn nasıhattaý boıynsha jobalar qolǵa alynady», deıdi kent ákimi.
Moıynty kentinde aýyz sý máselesi de sheshimin tapqan eken. Búgingi kúnde sý qubyrlary aýyldaǵy árbir úıge tartylǵan. Karantın shekteýleri jeńildetilgenimen, kenttegi sanıtarlyq-epıdemıologııalyq talaptardyń qatań saqtalýyna basa mán beriledi. «Mundaı tártiptiń adam kóp keletin jerlerde, naqtyraq aıtqanda dúkenderde, mekemelerde oryndalýyna aıryqsha nazar aýdaramyz. Bul turǵyda quramyna ákimdik qyzmetkerleri enetin arnaıy top reıdter uıymdastyryp turady», deıdi kent ákimi.
Aýyl halqy tótenshe jaǵdaı rejimi men karantın shekteýleri kezindegi qıyn jaǵdaıda jergilikti ákimdiktiń shyn janashyrlyq tanytyp, der kezinde kómek qolyn sozǵanyna dán rıza. «Kóptegen muqtaj otbasylar osyndaı qamqorlyqtyń arqasynda kúrdeli kezeńniń aýyrtpashylyǵyn asa qatty sezine qoımady», deıdi Moıynty kentindegi aqsaqaldar alqasynyń tóraǵasy Úmbet Adambaev.
Qaraǵandy oblysy,
Shet aýdany