Naýryzda bastalǵan qaıyrymdylyq aksııasy aıasynda el volonterleri 3 aı boıy tótenshe jaǵdaı saldarynan qoldaýǵa muqtaj bolǵan azamattarǵa kómektesip keldi. Maqtaaraldaǵy tabıǵı apattan zardap shekken aǵaıynǵa da járdem berilip, respýblıka boıynsha 500 myńnan astam otbasyǵa kómek kórsetilgen jobaǵa núkte qoıyldy.
Muqtaj jandarǵa ataýly áleýmettik kómek, azamattarǵa qoldaý kórsetýdi maqsat etken aksııa koronavırýs pandemııasy saldarynan elimizde tótenshe jaǵdaı rejimi engizilýine baılanysty 16 naýryzdan bastap Tuńǵysh Prezıdent – Elbasy Nursultan Nazarbaevtyń tapsyrmasymen qurylyp, jumysyn úılestirý Nur Otan partııasyna júkteldi.
Nátıjege keler bolsaq, Elbasynyń bastamasymen qurylǵan «Birgemiz» qoǵamdyq qoryna 24 mlrd teńgeden astam qarjy túsip, áleýmettik jaǵdaıy tómen 362 myń otbasyǵa 50 000 teńge kóleminde bir rettik qarjylaı kómek berildi. Oǵan qosa ár túrli óńirdegi 236 myńnan astam otbasyǵa azyq-túlik sebetteri men gıgıenalyq zattar jetkizildi.
Nur-Sultan, Almaty jáne Shymkent qalalarynda 100 myń otbasyǵa 5 mıllıon dana medısınalyq maska úlestirilip, 3000 jalǵyzbasty qart kúndelikti ystyq taǵammen qamtamasyz etildi.
«Biz birgemiz» aksııasyna jasotandyqtar bastamasymen respýblıka boıynsha 5 myńnan astam volonter kómek qolyn sozdy.
Bıyl 2 mamyr kúni Túrkistan oblysy Maqtaaral aýdanyndaǵy eldi mekenderdi sý basýyna baılanysty aımaqta tótenshe jaǵdaı jarııalanyp, oǵan da atalǵan aksııa sheńberinde volonterler jumyldyryldy. Sý basý saldarynan 31 myńnan astam aýdan turǵyny qaýipsiz ortalyqtarǵa evakýasııalandy.
Nur Otan partııasy men Jas Otan Jastar qanatynyń qalalyq jáne oblystyq fılıaldarynda gýmanıtarlyq kómek qabyldaý pýnktteri ashyldy. Partııa tarapynan elordadan 40 tonna gýmanıtarlyq kómek joldandy. «Maqtaaral, Birgemiz» volonterler shtaby qurylyp, oǵan barlyǵy 500-den astam volonter jumyldyryldy», deıdi Jas Otan Jastar qanatynyń jetekshisi Elnur Beısenbaev.
Aksııa barysynda rýhanı qundylyqtar da umyt qalǵan joq. Mamyr aıynyń 18-22 aralyǵynda Jas Otan Jastar qanatynyń belsendilerine túrli taqyrypta 17 túrli onlaın sessııa ótkizildi. Jastar birneshe kún boıy taım menedjment, volonterlik negizderi, onlaın is-sharalar ótkizý boıynsha dáris tyńdap, pikir almasty. Onlaın sessııalarǵa 550 volonter qatysty.
«Jalpy, atalǵan aksııa eldegi volonterlikti damytýǵa zor úles qosyp, jastarǵa eriktilik mádenıetin qalypastyrý men kómek kórsetýdiń mańyzdylyǵyn kórsetkendeı boldy. Jastarymyz «Volonter jyly» aıasynda sózden iske kirisip, biliktiligin de, bilimin de arttyrýǵa múmkindik aldy. Talaı otbasyǵa qoldaý bildirilip, qarttarymyzǵa kómek kórsetildi», dep túıindedi sózin E.Beısenbaev.