Qorqyt Ata atyndaǵy Qyzylorda memlekettik ýnıversıtetiniń rektory, Nur Otan partııasy oblystyq fılıaly Saıası Keńesiniń múshesi Beıbitkúl Karımova balalardy qorǵaýdyń halyqaralyq kúnine kúnine oraı «Atameken» otbasylyq úlgidegi balalar aýylyna baryp, búldirshinderdi merekemen quttyqtady.
Balalar aýylynda qazir 53 bala turady. Onyń ishinde tórteýi bıyl mektep bitiredi. Ýnıversıtet rektory mektep bitirýshi túlekterdi quttyqtap, aldaǵy biryńǵaı ulttyq testileýden súrinbeı ótýlerine tilektestigin bildirdi. Túlekterdi Qorqyt Ata atyndaǵy QMÝ-de bilim alýǵa shaqyryp, ózderi tańdaǵan mamandyq boıynsha 4 jyl tegin oqý sertıfıkattaryn tabystady.
- Qorqyt Ata atyndaǵy Qyzylorda memlekettik ýnıversıtetinde ata-anasynyń qamqorlyǵynsyz qalǵan 38 jas bilim alýda. Olar memlekettik, oblys ákimi granttary men ýnıversıtettiń, kóptegen kompanııalardyń qoldaýy negizinde tegin bilim alyp, ystyq tamaqpen qamtamasyz etilgen. Bıyl da «Atameken» otbasylyq úlgidegi balalar aýylynyń mektep bitiretin túlekterin qamqorlyqqa alatynymyzdy jetkizgim keledi, – dedi rektor.
Sonymen qatar, balalar aýylyndaǵy «Aqjaıyq» úıiniń 6 tárbıelenýshisine Nur Otan partııasy «Turan» fılıaly músheleriniń atynan Abaıdyń 175 jyldyǵyna oraı tarıhı-tanymdyq kitaptar tartý etti. Qorqyt Ata atyndaǵy QMÝ ujymy jyl saıyn «Atameken» balalar aýylyna kelip, balalarmen túrli merekelerdi birge ótkizip keledi.