Túrkistan oblysynyń krımınaldyq polısııa qyzmetkerleri brakonerlikke qatysy bar degen kúdikpen 10 adamnan turatyn qylmystyq topty ustady.
Qylmystyq top birneshe jyldar boıy Shardara sý qoımasynan zańsyz balyq aýlap júrgen. Polısııa departamentinde BAQ ókilderimen brıfıng ótkizgen departament basshysynyń orynbasary Qurmanbek Sahov sáýir aıynyń basynda departamentke belgisiz bireýler Shardara sý qoımasy aýmaǵynda zańsyz balyq aýlaýmen aınalysatyny týraly aryz kelip túskenin aıtty. Atalǵan jaıtty polısııa qyzmetkerleri QR Qylmystyq kodeksiniń 335-baby boıynsha sotqa deıingi tergep-tekserýdiń biryńǵaı tizilimine tirkep, jedel-izdestirý is-sharalaryn júrgizgen. Krımınaldyq polısııa qyzmetkerleri zańsyz balyq aýlaýmen aınalysqan qylmystyq toptyń izine túsken. Jedel ýákilder kúdiktilerdi ustaý úshin eki aı boıy dáleldemeler jınaqtapty. Qylmystyq kásipke kúdikti barlyq qatysýshylardyń baılanystary zerttelgen. Qorytyndysynda, maýsym aıynyń basynda polısııa qyzmetkerleri 10 adamnan turatyn qylmystyq topty ustady, onyń úsheýi áıel. Olardyń barlyǵy Túrkistan oblysy men Shymkent qalasynyń 20-dan 53 jasqa deıingi turǵyndary bolyp shyqty.
Aıǵaqty zat retinde balyq aýlaý quraldary (elektr qural-jabdyqtary, jeliler, metall ilmekter), 13 motorly jáne rezeńke qaıyqtar, 12 kalıbrli 389 oqtary, bir jarym tonnadan astam balǵyn balyq jáne 425 kılogramm ystalǵan balyq alyndy. Keltirilgen materıaldyq shyǵynnyń jalpy kólemi 8 000 000-nan astam teńgeni qurady. Q.Sahovtyń habarlaýynsha, kúdikti retinde úsh adam qamaýǵa alynyp, jeti adam eshqaıda ketpeý týraly qolhatpen bosatylǵan. Polısııa qyzmetkerleri brakonerlerdiń uıymdasyp áreket etkenin joqqa shyǵarmaıdy. Búginde sotqa deıingi tergeý amaldary jalǵasýda.
Túrkistan oblysy