«Saqtansań – saqtaıdy» degen babalar aıtqan qaǵıdany bilmeıtinder kemde-kem. Alaıda bile tura saqtyqqa salǵyrt qaraıtynymyz ókinishti. Jahandy sharpyǵan COVID-19 vırýsyn juqtyrǵan otandastarymyzdyń qatary kún sanap kóbeıip bara jatqany osyny ańǵartady.
Kúni keshe Prezıdent Q.Toqaev týıtterdegi jeke paraqshasynda:
– Úkimettik komıssııanyń barlyq is-áreketine qaramastan, indetke shaldyqqan azamattarymyz azaımaı otyr. Koronavırýstyń ekinshi tolqynynyń qaýpi seıilmegenin DDU da rastady. Otandastarymyzdy jappaı aýrýǵa shaldyǵýdan qashyp, indetten qorǵanýdyń joldaryn (ara qashyqtyqty saqtaý, dezınfeksııa, jeke tazalyq, betperde kııý) ustanýǵa taǵy da shaqyramyn, – dep jazdy.
Shyndyǵynda, qaýipti indettiń beti qaıtty dep erkinsýge áli erte. Densaýlyq saqtaý mınıstri Eljan Birtanov aıtqan derekterge úńilsek, kerisinshe dabyl qaǵý qajet syńaıly. Sońǵy derek boıynsha elimizde vırýs juqtyrǵandardyń sany 12 124-ten asty. Áıteýir, naýqastardyń basym bóligi, atap aıtqanda 77 paıyzy aýrýdy jeńil ótkizýde. 52 paıyzy emdelip shyqqany da – kóńilge medeý. Al aýrýhana tóseginde jatqan 5 836 adamnyń 59-ynyń jaǵdaıy aýyr. Olaı bolsa, saqtyqty umytqanymyzǵa jol bolsyn!
Kóktemdi qatań karantın qushaǵynda ótkizgen elimiz eki aıdan astam ýaqytqa sozylǵan tótenshe jaǵdaıǵa tártippen tótep berdi. Tótenshe jaǵdaı toqtasa da, karantın jalǵasatyny týraly eskertý az aıtylǵan joq. Alaıda kún saıyn júzdegen adamnyń vırýs juqtyryp jatqanyn eskersek, qaýipsizdik talaptaryn qulaqqa ilmeı júrgen tárizdimiz. Maskany ıekke ile salyp, kóshede erkin serýendep júrý qalypty qubylysqa aınaldy. Áıteýir, erkinsýdiń sońy san soqtyrmaǵaı.