Asa aýyr salmaqta judyryqtasyp júrgen Qazaqstannyń kásipqoı boksshysy Ivan Dychko aldaǵy ýaqytta tek qana myqtylarmen kúsh synasqysy keletinin málimdedi.
- Eki jylǵa jeter-jetpes ýaqyt aralyǵynda kásipqoılar arasynda men 9 kezdesý ótkizip, barlyǵynda aıqyn jeńiske qol jetkizdim. Eger koronavırýske baılanysty jarystar toqtylmaǵanda onda jekpe-jekterimniń sany birshama kóbirek bolatyn edi. Al aldaǵy ýaqytta men Aleksandr Povetkın (35-2-1, 24 KO), Marıýsh Vah (35-6, 19 KO) jáne Dıllıan Ýaıt (27-1, 18 KO) syndy ataǵy alysqa jaıylǵan jigittermen judyryqtasqym keledi. Odan keıin chempıondyq beldeý úshin talasýǵa da bolady, - deıdi Ivan Dychko.
Bıyl 11 tamyzda 30 jasqa tolǵaly otyrǵan Qostanaı boks mektebiniń túlegi áýesqoı rıngte aýyz toltyryp aıtarlyqtaı tabystarǵa qol jetkizdi. London jáne Rıo Olımpıadalarynyń qola júldesin ıelendi. Álem chempıonatynda eki kúmis jáne bir qolany enshiledi. Azııa oıyndarynyń jeńimpazy jáne kúmis júldegeri degen ataqtary bar. Sondaı-aq, ol Azııa chempıonatynda top jardy.