Áleýmettik jelidegi jurtqa birneshe kúnnen beri azyq bolyp turǵan taqyryp – Shymkenttegi Jastar resýrstar ortalyǵy shyǵarǵan beınerolık. Talqylaýǵa aralaspaǵan adam kemde-kem desek artyq aıtpaspyz.
Jelige tirkelgen, qolynda smartfony bar jurttyń birazy habardar bolǵandyqtan, daýly rolıktiń mazmunyn aıtyp jatpaıyq. Jalpy, jurt onda nasıhattalǵan dúnıeni qoldaıtyndar men qoldamaıtyndar bolyp ekige jaryldy. Beıjaı qarap otyrǵandar da bar, árıne. Qysqasy, birneshe kúnnen beri oǵan ár túrli qyrynan úńilip jatyr jurt.
Qoldaıtyndardyń paıymyn túıindep aıtsaq, dinimiz ben dilimizdegi ustanym boıynsha qazaq qyzdary etegi sholtıǵan «ıýbka» kımegeni jón, osyndaı rolıkterdi kóbirek shyǵarý kerek degenge saıady. Qarsylar zaıyrly qoǵamda kim qalaı kıinse de óz erki deıdi. Olardyń pikirinshe, qyz balany kóligine mingizip alyp, kıim kıisine synaýǵa, aqyl aıtyp moral oqýǵa kóldeneń kók attylardyń eshqandaı quqy joq.
Beınerolıktiń bıýdjet qarajatyna túsirilgeni de daýdy odan saıyn ýshyqtyrdy. Factcheck.kz-tiń habarlaýynsha, Shymkenttegi JRO bul beınerolıkti naqty qansha teńgege túsirgenin anyqtaý qıyn. «...Sebebi tender erejesi boıynsha oryndaýshy (jetkizýshi) 5 rolık túsirýi kerek. Jalpylama túrde 6,2 mln-dy rolık sanyna bóle salýǵa bolady, biraq bul naqty baǵany bermeıdi. Áýelde tenderge 8 mln teńge bólingen. Jetkizýshi – «Talasov Serık Týrebekovıch» JK qyzmetine eń az somany, ıaǵnı 6,2 mln teńge usynyp tenderdi jeńip aldy. Kelisimshart jyldyń sońyna deıin jasalǵan, jetkizýshi qyzmetti bıyl 3 qazanǵa deıin oryndaýy kerek. Qazir 6,2 mln teńgeniń 3 mln-y jumsalǵan. Qansha beınerolık túsirilgeni belgisiz».
Belgili zańger Djohar Ýtebekovtiń aıtýynsha, beınerolıktiń mazmunynan zańǵa qaıshy dúnıelerdi nasıhattaý baıqalady. Zańger beıtanys erkektiń qyz balany kóligine otyrǵyzyp, esigin jaýyp alǵany, kıimine qarap jezókshege teńegenin «usaq buzaqylyq áreket» dep baǵalady, jolaýshyǵa moraldyq zııan shektirdi degen pikir bildirdi.
Jalpy, názik jandylardyń ashýyn týdyrǵan, qoǵamnyń basqa da músheleriniń qarsylyǵyna tap bolǵan bolǵan pikir ıeleri sońǵy ýaqytta jıilegeni belgili. Soǵan qaraı otyryp, birneshe qorytyndy jasaýǵa bolatyn syńaıly. Qazirgi qoǵam burynǵydaı basqalardyń kóńiline qaramaı pikir aıtatyndardy kótermeıdi, ózimen sanasýǵa májbúrleıdi. Sanaspasa, qoǵam ony jazalaýy da múmkin. Bul – bir.
Ekinshiden, qoǵamdaǵy kemshilikterdi báz-baıaǵy ádispen qurǵaq aqyl aıtý arqyly túzeıtin ádis eskirdi. Halyqtyń sanasyna basqa tereńdeý, jan-jaqty zerttelgen tásilmen ǵana áser etýdiń joldaryn qarastyrǵan jón. Aıtpaqshy halyqtyń bıýdjet qarjysynyń qalaı jumsalǵanyna alańdaýshylyǵy kúsheıgenin de osy oqıǵa kórsetti. Bir anyǵy, jastardy taptaýryn ssenarııge qurylǵan beınerolıkpen, qurǵaq aqylmen tárbıeleý múmkin emes. Mundaı rolık bir taraptyń ashý-yzasyn týǵyzady, tipti eregestirýi de múmkin. Al ekinshi taraptyń aıyzyn qandyrady. Qoǵamnyń jaq-jaqqa bólinip qyrylǵany emes, basqa nátıje, naqty paıdaly nátıje shyqqanyn qalasaq, máselege basqa qyrynan úńilip kórgen jón bolar.