О́tken apta sońynda Mádenıet jáne sport mınıstrligi Til saıasaty komıtetiniń tapsyrysy boıynsha Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy «Qazaqstan Respýblıkasynda til saıasatyn iske asyrýdyń 2020-2025 jyldarǵa arnalǵan memlekettik baǵdarlamasy» aıasynda memlekettik tildiń qoldanys aıasyn keńeıtý, ilespe aýdarmashylardyń biliktiligin arttyrý maqsatynda qazaq tilinen aǵylshyn, aǵylshyn tilinen qazaq tiline ilespe aýdarma júrgizýdi úıretý kýrsyn ótkizdi.
Kýrs barysynda aýdarma teorııasy, jazbasha aýdarma men aýyzsha aýdarmanyń erekshelikteri, ilespe aýdarmashyǵa qajetti bazalyq grammatıkalyq jáne frazeologııalyq úlgileri, sózdik qordy baıytý jumystary boıynsha dárister oqyldy.
Sonymen qatar aýdarmashy mamandarǵa aýdarma teorııasy men praktıkasy, aýdarmatanýdyń ózekti máseleleri sheńberinde oqý-ádistemelik kómek kórsetilip, aýdarma salasyndaǵy ǵalym mamandar ozyq tájirıbesimen bólisti.
Ortalyq jáne jergilikti atqarýshy organdarynyń sala mamandary qatysqan kýrsty L.Gýmılev atyndaǵy Eýrazııa ulttyq ýnıversıteti aýdarma teorııasy men praktıkasy kafedrasynyń dosenti, PhD doktory Aqnur Muhıtqyzy Tóleýbaeva júrgizdi.
Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń Bas dırektory Álibek Asqar buǵan deıin qazaq-orys, orys-qazaq tilderine aýdarýshylarǵa arnalǵan kýrstar uıymdastyrylsa, bul jolǵy shara, tuńǵysh ret memlekettik tildiń mártebesin asqaqtatý maqsatynda qazaq-aǵylshyn aǵylshyn-qazaq tilderi mamandaryna arnalyp otyrǵanyn aıtyp, qatysýshylarǵa biliktilik sertıfıkatyn tabystady.
«Mamandyqtyń mártebesi degen uǵym bar. Sońǵy on jyldyń ishinde osy baǵytta kóptegen jumystar júzege asty. Bul shara memlekettik qamqorlyqtyń naqty kórinisi bolyp tabylady. О́te joǵary deńgeıde ótti, uıymdastyrýshylarǵa shynaıy rızashylyǵymdy bildiremin», - dedi L.Gýmılev atyndaǵy Eýrazııa ulttyq ýnıversıteti aýdarma teorııasy men praktıkasy kafedrasynyń dosenti, PhD doktor Aqnur Tóleýbaeva.