Osydan dál bir jyl buryn qazaq halqynyń dańqty perzenti Baýyrjan Momyshulynyń jan degende jalǵyz uly, belgili jazýshy Baqytjan Momyshulynyń kóńilin suraýǵa bardym. Kire beriste qarsy alǵan jazýshynyń jubaıy Zeınep Ahmetova:
– Keshe aýyldan qaryndastary kelip edi. Kóńilin suraý úshin... Olardy tanymady... Qıyn bolyp tur.., – dep kózine jas aldy.
Osydan dál bir jyl buryn qazaq halqynyń dańqty perzenti Baýyrjan Momyshulynyń jan degende jalǵyz uly, belgili jazýshy Baqytjan Momyshulynyń kóńilin suraýǵa bardym. Kire beriste qarsy alǵan jazýshynyń jubaıy Zeınep Ahmetova:
– Keshe aýyldan qaryndastary kelip edi. Kóńilin suraý úshin... Olardy tanymady... Qıyn bolyp tur.., – dep kózine jas aldy.
Biraq, Baqytjan aǵa meni tanydy. «Baqytbek...», dep etten aryǵan saýsaqtarymen qolymdy qysyńqyrap: «Dúnıe astan-kesten bolyp ketti ǵoı, qalaısyń kókem, jaryǵym, kórinbeı kettiń ǵoı, kelip tursańdarshy», – degen. Ol kisi maǵan ylǵı da osylaı aıtatyn. Batyrdyń bel balasynyń qýarǵan júzinen qaıǵynyń izin kórsem de, kóńili buzylmady. Qudaıyna túzý adam ǵoı, shúńireıgen kózinen qımastyq sezilse de, bosamady, esin tez jıyp aldy. Týǵan-týystary esi kirgenine ań-tań. «Parlamentte ne bolyp jatyr, eki kún boldy teledıdar kóre almadym», – dedi taǵy da.
Baqytjan aǵa munyń aldynda da talaı ret senim hat berip eskertken bolatyn, osy joly da myna máseleni esime salyp jatyr. Elimizde Baýyrjan Momyshulyna qatysty túrli sharalardyń ótkiziletini belgili ǵoı. Mine, osy sharalarda Baýyrjan Momyshulynyń aty men zatyna qatysty rámizder men belgi-bederlerdiń (medal, belgi, tańba jáne t.b.) qatesiz jazylýyn, olardan qate ketpeýin qadaǵalaýdy tapsyryp: «Osy sharalardyń bárine de óziń bas-kóz bol!» degen-di. Osyny taǵy da esime saldy.
Sol kúni Oralǵa júrip kettim. Oralǵa barǵannan keıin: «Baqytjan Momyshuly qaıtys boldy», degen sýyq habar da jetti...
Baqytjan Momyshulynyń jazýshylyǵy men aýdarmashylyq óneri jaıynda az jazylǵan joq. Bul – Baqytjan Momyshulynyń shyǵarmashylyǵy óte joǵary baǵalanǵanynyń belgisi. Onyń shet jaǵasyn ózim de kórdim. «Men kórgen soǵys» degen kitabym jaryq kórgennen keıin osy kitapty orysshaǵa («Voına, kotorýıý vıdel ıa») Baqytjan aǵa aýdardy. Oqyǵandar «Men kórgen soǵys» pen «Voına, kotorýıý vıdel ıa» kitaptaryn salystyrǵanda senikinen Baqytjan aǵanyń sózi ozyńqyrap turatynyn baıqaıtynyn aıtatyn. «Aýdarǵannan keıin osylaı ozdyryp aýdarý kerek qoı!» deıtin ishteı rıza bolǵandar.
Baqytjan Momyshuly jazýshylyǵymen, aýdarmashylyǵymen qatar, jan-jaqty, úlken estet, asa bilimdi tulǵa edi. Meniń jeke basymdy, ásirese, tánti etkeni – Baqytjan Momyshulynyń ózinen buryn ákesiniń abyroıyn oılaıtyny edi. Birde úı týraly áńgime bolyp qaldy. «Joǵary jaqqa baryp, nege úıdi keńeıtip almaısyz?» dedim Baqytjan aǵaǵa. «Men sol seniń joǵary jaǵyńa barsam, olar «Baqytjan Momyshuly keldi», «Baqytjan úı surap keldi» demeıdi, «Baýyrjan Momyshulynyń balasy úı surap júr», deıdi. Sondyqtan da bul jerde qanaǵat etýge týra keledi. Ázirshe osy úı de jetedi...», dedi aǵamyz.
Ákeni syılaý, ákeni qadirleý osyndaı-aq bolar, Baqytjan Momyshuly myna ómirden ákesiniń dańqy men ataq-abyroıyna qylaýdaı daq túsirmeı ótti. Dańqty, ataqty, abyroıly adamnyń balasy qandaı bolýy kerek? Baqytjan Momyshuly aǵamyz osy saýalǵa óziniń ómirimen, óziniń ónege-úlgisimen tolyq jaýap berip ketti ǵoı dep oılaımyn.
Qazirgi kúni ataqty adamdardyń toıymsyz, qanaǵatsyz, suramsaq ul-qyzdaryn kórgende, oıyma ylǵı da Baqytjan aǵa oralady. Baqytjan aǵanyń qanaǵatshyldyǵy eske túsedi...
Baqytbek SMAǴUL,
Májilis depýtaty, Aýǵan soǵysy ardagerler uıymdarynyń «Qazaqstan ardagerleri» qaýymdastyǵynyń tóraǵasy.