Oqýshyny qorlaǵany úshin mektep dırektory men kelini jumystan qýyldy
Onsyz da jaqsy jaǵynan góri jaman daǵdylarymen kóbirek kózge túsip júrgen Qyzyljar óńiriniń ustazdary adamnyń úsh uıyqtasa túsine kirip shyqpaıtyn ospadar is-áreketterimen el ishin taǵy ulardaı shýlatty.
Oqýshyny qorlaǵany úshin mektep dırektory men kelini jumystan qýyldy
Onsyz da jaqsy jaǵynan góri jaman daǵdylarymen kóbirek kózge túsip júrgen Qyzyljar óńiriniń ustazdary adamnyń úsh uıyqtasa túsine kirip shyqpaıtyn ospadar is-áreketterimen el ishin taǵy ulardaı shýlatty.
Bul bassyzdyqty estigen turǵyndar jaǵalaryn ustap, esterin jııa almaı dal. Jambyl aýdandyq prokýratýrasy oqýshynyń janyna aıyqpas jara salyp, psıhologııalyq aýyr halge túsirgen muǵalimniń qulaq estip, kóz kórmegen qatygezdigin áshkerelep, jalpaq jurtqa jar salǵannan keıin ǵana senbeske amaldary qalmady.
Baýman mektebindegi matematıka pániniń muǵalimi K. Ásimjanova algebra sabaǵynda T. degen oqýshyny synyptastarynyń aldynda ábden masqaralaǵan. Úı tapsyrmasyn bilmegeni úshin ǵana jetkinshektiń kekil shashyn qyrqyp, qaq mańdaıyna qara sııamen «dvoechnık» dep battıtyp jazyp qoıǵan. Qarǵys atqyr «qara tańbany» óshirmeýge ámir etedi. О́ıtken jaǵdaıda taǵy bir «ekilikti» qonjıtatynyn aıtyp, záre-qutyn qashyrady. О́zgelerge bul jóninde eshkimge tis jarmaýdy buıyrady. Meniń tilimdi alsańdar, birinshi toqsanda bárińdi «bestikke» shyǵaramyn degen tátti sózderin aıtýdy da umytpaıdy. Sóıtse, ol qaıyn enesi bolyp sanalatyn mektep dırektory K.Karabaevanyń arqasynda osylaısha esirip, taırańdap júrgen bolyp shyqty.
Prokýratýranyń uıǵarymymen baǵa qoıýda kúndelik pen mańdaıdy shatastyrǵan K.Ásimjanova oqý-tárbıe jumystarynda moraldyq jat qylyqtarǵa jol bergeni úshin Eńbek kodeksiniń 54-shi babymen jazalanyp, jumystan shyǵaryldy. Dırektor da qyzmetimen qosh aıtysty. Júregi shaılyǵyp, qorqyp qalǵan jábirlenýshiniń ata-anasy sotqa júginip, moraldyq shyǵyn óndirip alýǵa bekingen syńaıly.
О́mir ESQALI,
«Egemen Qazaqstan».
Soltústik Qazaqstan oblysy,
Jambyl aýdany.