Oblys ákimi Mahambet Dosmuhambetov ótkizgen jıynda "Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan "Eńbek" memlekettik baǵdarlamasynyń oryndalý barysy men eńbekaqy bereshegin boldyrmaý, sondaı-aq, elektrondyq eńbek sharttary talqylandy", dep habarlaıdy Egemen.kz
Byltyr Atyraýda atalǵan baǵdarlama sheńberinde 28 344 adam jumyspen qamtylyp, 5 mlrd teńge qarjy ıgerildi. Josparlanǵan sharalar tolyǵymen oryndaldy. Al, bıyl baǵdarlama aıasynda 23 566 adamdy jumyspen qamtý kózdelipti.
"Jyl basynan beri Jumyspen qamtý ortalyqtaryna habarlasqan 11 410 adamnyń ishinen 6 217-i ıaǵnı 54,5 paıyzy jumyspen qamtyldy. Qazir jumyssyzdar sany 9 805 adamdy qurap otyr", - dedi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Serik Qamıdolla.
Alaıda, mekemeler usynǵan turaqty jumys oryndaryna 2 344 adam ornalastyrylyp, jospar 19,5% ǵana oryndalypty. Budan da tómen kórsetkishter Atyraý qalasynda (9,8%), Jylyoı jáne Isataı aýdandarynda (14,8%) baıqalyp otyr.
Osyǵan oraı oblys ákimi Mahambet Dosmuhambetov memlekettik baǵdarlama aıasynda júzege asýy tıis jumystardy uıymdastyra almaı otyrǵan aýdan ákimderiniń jumysyn synǵa aldy.
"Jumystaryńyzda kemshilik kóp. Bárin karantınge silteısizder. Maǵan jospardy qaı ýaqytta tolyq oryndaıtyndaryńyz kerek. Kelesi aıda júktelgen mindetti qanshalyqty oryndap, kórsetkishterdi jaqsarta alasyzdar? Naqty josparlaryńyzdy aıtyńyzdar. Karantındi syltaýratýdy qoıý kerek. Jumys isteıtinderge árdaıym jol ashyq. Tótenshe jaǵdaı, tipti karantın kezinde de jumys isteýge arnaıy ruqsat berdik. Oblystyq arnaıy shtab sol úshin kúni-túni jumys istedi" - dedi aımaq basshysy.
Oblys ákimi quzyrly organdarmen birlesip, mekemeler men kásiporyndarda eńbekaqynyń ýaqytyly jáne tolyq kólemde tólenýine monıtorıng jasaýdy tapsyrdy.