Bul týraly Sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev halyqqa esep berý kezdesýinde aıtty, - dep habarlaıdy Egemen.kz.
Qyzmet kórsetýdiń proaktıvti formaty boıynsha memleket azamatqa qajetti qyzmetti kórsetýdi ózi usynady. Bul rette azamatqa qujat resimdeý nemese ótinim berý úshin eshqaıda barýdyń qajeti joq, qajetti aqparatty kelgen SMS-habarlamaǵa jaýap retinde jiberý jetkilikti.
Qazir memlekettik qyzmettiń 5 túri proaktıvti formatta kórsetiledi. Balanyń týý týraly kýáligin SMS-habarlama jiberý arqyly resimdeýge bolady. Sondaı-aq, "Altyn alqa" jáne "Kúmis alqa" ıeleri járdemaqyny osy tásilmen resimdeı alady.
"Búginde Qazaqstanda qyzmettiń 80%-dan astamy – elektondyq qyzmetter. Iаǵnı, biz qyzmetterdi proaktıvti formatqa kóshirýge múmkindik beretin avtomattandyrýdyń osyndaı deńgeıine qol jetkizdik. Adamdarǵa eshqaıda barýdyń qajeti joq, kelgen habarlamaǵa jaýap berý arqyly memlekettik qyzmetterdi ala alady", - dedi Asqar Jumaǵalıev.
Mınıstr vedomstvoaralyq komıssııanyń sheshimimen proaktıvti formatta kórsetiletin 30 qyzmet iriktelgenin habarlady. Olardyń arasynda – júktiligi men bosanýy boıynsha tólemderdi taǵaıyndaý, múgedektikti belgileý, mektepke qabyldaý, kóshelerdi nemese eldi mekenderdi qaıta ataý kezinde mekenjaı derekterin ózgertý, jerleýge arnalǵan birrettik tólemdi taǵaıyndaý qyzmetteri bar.
"Qazir júkti áıelderge dekrettik tólemderdi resimdeý úshin HQKO-ǵa barýy kerek. Bul qyzmet proaktıvti formatqa kóshirilgen soń, eńbekke jaramsyzdyq paraǵyn resimdegennen keıin SMS-habarlama keledi, soǵan jaýap berý arqyly olar járdemaqyny resimdeı alady. Eń bastysy – SMS-habarlama alý úshin mobıldi azamattar bazasynda tirkelgen bolýy tıis", - dep túsindirdi mınıstr.
Proaktıvti qyzmetterdiń kóbin osy jyldyń sońyna deıin iske qosý josparlanǵan. Bul úshin osy qyzmetterdi kórsetýshi memlekettik organdar óz júıeleri arasynda derekter almasýdy qamtamasyz ete otyryp, barlyq qajetti ıntegrasııalyq jumystardy aıaqtaýy tıis.