«Rýhanı jańǵyrý» qazaqstandyq qoǵamdyq damý ınstıtýty áleýmettik mańyzdy baǵyttar boıynsha qoldanystaǵy zańnamany talqylaý sıklin jalǵastyrýda. Jýyrda onlaın formatynda «Densaýlyq saqtaý salasyndaǵy ashyqtyq: jańa trendter aqparat qoljetimdiligine qalaı áser etedi?» atty ekinshi pikirtalas alańy ótti.
Pikirtalas alańy sheńberinde sarapshylar qoldanystaǵy densaýlyq saqtaý salasyndaǵy zańnamadaǵy aqparatqa qol jetkizý máselesin, atap aıtqanda, pandemııa jaǵdaıynda anyqtalǵan osal jaqtardy talqylady jáne Memleket basshysy Qasym-Jomart Toqaev jarııalaǵan «Halyqqa qulaq asatyn memleket» tujyrymdamasy sheńberinde jumysty jetildirý boıynsha óz usynystaryn berdi.
Dıalogty asha otyryp, alań moderatory, Eýropalyq quqyq jáne adam quqyqtary ınstıtýtynyń dırektory Marat Báshimov sıfrlandyrý jáne pandemııa aqparatqa qoljetimdilik reglamentin ózgertý qajettiligine ıtermelegenin atap ótti.
«Prezıdent Ákimshiliginiń janynan qurylǵan ótinishterdi qaraýdy baqylaý bólimi ózin óte tıimdi kórsetti. Endi adamdar Memleket basshysyna tikeleı jazady. Sondyqtan Densaýlyq saqtaý mınıstrliginiń janynan uqsas qurylym qurý qajet dep sanaımyn», dedi Marat Báshimov.
Sonymen qatar ÚEU «Áleýmettik jáne quqyqtyq zertteýler ortalyǵynyń» dırektory Aısana Sman «Aqparatqa qol jetkizý týraly» Zań 5 jyl buryn sol ýaqyttyń tendensııalaryn eskere otyryp qabyldanǵanyn atap ótti. Al jańa jaǵdaıda, onyń pikirinshe, osy Zańmen nemese «Halyq densaýlyǵy jáne densaýlyq saqtaý júıesi týraly» Kodeksimen retteýin qajet etetin máseleler paıda boldy.
«Bul sala qajet, sebebi «Aqparatqa qol jetkizý týraly» Zańnyń altynshy babynda azamattyń densaýlyǵyn saqtaýǵa baılanysty aqparatqa qol jetkizý quqyǵy shektelmeıdi dep jazylǵan. Iаǵnı zań densaýlyq saqtaý salasynda bolyp jatqan barlyq nárselerdi zańnamamen de, basqa da normatıvtik aktilermen de shektelmeıtinin tikeleı aıtady», dedi Aısana Sman.
Sonymen qatar sarapshylar sıfrlandyrý jáne aqparatqa qol jetkizý halyq arasyndaǵy áleýmettik shıelenisti azaıtýǵa baǵyttalǵan degen pikir bildirdi.
Talqylaýǵa «Rýhanı jańǵyrý» qazaqstandyq qoǵamdyq damý ınstıtýty» KEAQ Basqarma tóraǵasy Kemelbek Oıshybaev, Prezıdent Is basqarmasy aýrýhanasynyń salaýatty ómir saltyn qalyptastyrý ortalyǵynyń jetekshisi Marat Qurmanov, Densaýlyq saqtaý mınıstrligi, Aqparat jáne qoǵamdyq damý mınıstrligi, óńirlik densaýlyq saqtaý basqarmalarynyń ókilderi jáne sarapshylar qatysty.
Esterińizge sala keteıik, jaqyn arada Qazaqstandyq qoǵamdyq damý ınstıtýty jer qatynastary, ekologııa, qarjy jáne halyqty áleýmettik qorǵaý salasyndaǵy «aqparatqa qol jetkizý týraly» zańdy talqylaý boıynsha pikirtalas alańyn ótkizýdi josparlap otyr.