Nur-Sultan qalasy ákimdiginiń mobıldi toby polıseılermen jáne epıdemıologtermen birlesip, kásiporyndardaǵy sanıtarlyq normalardyń saqtalýyn qadaǵalaıtyn reıdter júrgizedi.
Reıd barysynda qonaqúıler, bazarlar, meıramhanalar men dámhanalar jáne t.b. kópshilik oryndar tekserilgen.
«Búgingi tańda biz elordalyq bas sanıtarlyq dáriger qaýlysynyń saqtalýyna monıtorıng júrgizýdemiz. Osy ýaqyt aralyǵynda Saryarqa aýdanyndaǵy 300 nysanǵa monıtorıng júrgizildi. Onyń ishinde 100 nysanda sanıtarlyq sharalar saqtamaǵan. Nysandar bul olqylyqty túzetkenge deıin jabyldy. Kásipkerlerge túsindirý júrgizildi. Nysandar sannormalardy qatań saqtaýǵa mindetti: kire beriste sanıtaızerler (antıseptıkter) bolýy tıis, qyzmetkerler men klıentter betperde kııý kerek. Sondaı-aq ústel arasyndaǵy 2 metr qashyqtyqty saqtaýdy qamtamasyz etý mańyzdy. Kelýshiler maska taǵyp júrýi qajet», dep atap ótti Saryarqa aýdandyq Taýarlar men kórsetiletin qyzmetterdiń sapasy men qaýipsizdigin baqylaý departamenti sanıtarlyq-gıgıenalyq qadaǵalaý bólimi basshysynyń mindetin atqarýshy Damıra Nuran.
Eger kelýshi joǵaryda atalǵan erejelerdiń saqtalmaǵanyn baıqaıtyn bolsa, 109 nómirine habarlasýǵa nemese Taýarlar men kórsetiletin qyzmetterdiń sapasy men qaýipsizdigin baqylaý basqarmasynyń kez kelgen bólimshesine qońyraý shalyp nemese ótinish/shaǵym jaza alady.
«Barlyq jaýapkershilikti sezinip, sanıtarlyq normalardy saqtaıtyn azamattar bar. Alaıda sanıtarlyq normalar men talaptardy elemeıtinder de kezdesedi. Biz jetkilikti mólsherde antıseptık satyp aldyq. Kire beriste qonaqtar men qyzmetkerler qolyn óńdeı alady. Barlyq jerde jeldetý júıesi qondyrylǵan. Barlyq qural-jabdyqtar, onyń ishinde ústelder men oryndyqtar arnaıy suıyqtyqpen óńdeledi», deıdi «Izbýshka» ashanasynyń ákimshisi Gúljaýhar Bıǵalıeva.
Kásipkerler sanıtarlyq normalardy qatań saqtaýy tıis, óıtkeni indetti juqtyrý qaýpi áli de saqtalady. Sanıtarlyq normalar saqtalmaǵan jaǵdaıda, nysandar óz jumysyn toqtatady.