Álemdegi tuńǵysh adamnyń mıy arqyly basqarylatyn aıaq protezi AQSh-tyń Chıkago qalasyndaǵy Saýyqtyrý ınstıtýtynda tekserýden ótkizilip jatyr. Bul týraly Paranormal-news.ru habarlady.
Mundaı protezdi bıonıkalyq protez dep ataıdy. Budan buryn bul tásilmen jasandy qol jasalyp shyǵarylǵan edi. Alaıda, jasandy aıaq jasap shyǵarý mamandarǵa úlken qıyndyq týdyrýda. Sebebi, adamnyń turyp, júrýi úshin jasandy músheni qozǵalysqa keltiretin motorǵa úlken salmaq túsedi. Sonymen qatar, qurylǵynyń salmaǵy da jeńil bolýy tıis.
Jol apatyna ushyrap, aıaqsyz qalǵan Zak Zaýter zertteýshilerge bıonıkalyq protezdi tekserýge kómektesýde. Ol jańa qurylǵynyń óziniń buryn qoldanyp júrgen mehanıkalyq protezinen úlken aıyrmashylyǵy bar ekenin moıyndaıdy. Mysaly, Zaýter bıonıkalyq protezben baspaldaqtan kóterilgen kezde eki aıaǵyn kezekpen basyp júre alady. Al mehanıkalyq protezdi qoldanyp baspaldaqqa shyqqanda ol protezdi saý aıaǵynyń artynan súıretip qana kóteriletin. Sondaı-aq yldılaý jermen júrý ońaıǵa túsedi. Ári júristiń ózi tabıǵı kórinedi. Jańa qurylǵynyń mehanıkalyq protezden taǵy bir ereksheligi bar. Máselen, otyrǵan kezde mehanıkalyq protezdi qozǵaltý úshin qoldyń kómegi qajet. Al bıonıkalyq protez adamnyń oıyn oqý arqyly mundaı qozǵalystardy áldeqaıda jeńildetedi. Qurastyrýshylar jańa qurylǵynyń kemshilikterin túzep, jasandy músheni odan ári jetildirý ústinde. Jańa qurylǵy 3-5 jyldyń kóleminde naryqqa shyǵýy múmkin. Aıaqqa arnalǵan bıonıkalyq protezdiń boljamdy baǵasy ázirge aıtylmaı otyr. Al dál osy qurylǵynyń qolǵa arnalǵan nusqasynyń baǵasy 20-dan 120 myń dollarǵa deıin barady.
Aıdar О́risbaev.