Erejesiz jekpe-jekte óner kórsetetin qazaqstandyq sportshylar arasynda UFC uıymymen birinshi bolyp kelisimshart jasaǵan Shavkat Rahmonovtyń amerıkalyq uıymdaǵy birinshi qarsylasy anyqtaldy, - dep habarlaıdy Egemen.kz.
Rahmonov óziniń birinshi kezdesýin 15-shilde kúni Abý-Dabı qalasynda ótkizedi. Onyń qarsylasy M-1 Challenge uıymynyń burynǵy chempıony Ramazan Emeev bolady.
33 jastaǵy Emeev UFC-da tórt kezdesý ótkizgen. Reseılik sportshy ótken jyly Máskeýde ótken týrnırde tóreshilerdiń sheshimi boıynsha Rokko Martınnen jeńilse, oǵan deıin Sem Alvı, Alberto Mına jáne Stefan Sekýlıcha degen qarsylastarynan ústem túsken.
25 jastaǵy Rahmonov bolsa jartylaı orta salmaqtaǵy M-1 Challenge chempıondyq ataǵyn ótken jyly naýryzda jeńip aldy. Otandasymyz Danıl Prıkazadany jeńdi.
Áý basta Rahmonov UFC-degi birinshi kezdesýin naýryz aıynda London qalasynda uıymdastyrylǵan UFC Fight Night 171 týrnırinde ótkizýi kerek tuǵyn. Qarsylasy da anyqtalyp qoıǵan edi. Ol polshalyq Bartosh Fabınskı bolatyn. Alaıda, koronavırýs pandemııasyna baılanysty týrnırdi AQSh-qa aýystyryp jiberdi. Al Rahmonov vıza máselesine baılanysty Amerıkaǵa bara almady.
Aıta keteıik, Shavkat Rahmonov 2019 jyldyń shildesinde UFC uıymymen kelisimshart jasady. Osylaısha ol qazaq sportshylary arasynda bul bedeldi uıymmen birinshi bolyp shartnama jasady.