Kenshiler astanasyndaǵy oblystyq klınıkalyq aýrýhananyń bólimshe meńgerýshisi Baıanbek Aspandııarovtyń úı betin kórmegenine tórt aı bolypty. Arqa tósine «jaman tumaý» qalaı aıaq basty, sol kezden bastap búginge deıin ınfeksııalyq gospıtalda koronavırýspen kúrestiń qalyń ortasynda júr.
«Meniń zaıybym da dáriger, pedıatrııa salasynyń mamany. Qazir úıde bala baǵyp, dekrettik demalysta otyr. Bizdiń salanyń mamany bolǵan soń ol kisi bárine de túsinistikpen qaraıdy», deıdi keıipkerimiz. Baıanbek Aspandııarov – Pavlodar oblysyndaǵy Baıanaýyl topyraǵynyń týmasy. Mektep bitirgen soń ájesiniń aqylymen dáriger mamandyǵyn tańdapty. Qaraǵandy memlekettik medısına ýnıversıtetiniń jalpy medısına fakýltetinde 2009-2014 jyldar aralyǵynda oqyǵan. Odan keıin pedıatrııa ınternatýrasyn bitirip, 2016-2018 jyldary juqpaly aýrýlar rezıdentýrasynda bilimin jetildiripti.
Juqpaly aýrýlar dárigeri sodan beri oblystyq klınıkalyq aýrýhanada abyroımen jumys istep keledi. Jas ta bolsa qarym-qabileti baǵalanyp, atalǵan mekeme dırektorynyń orynbasary qyzmetin de biraz ýaqyt atqarǵan eken. Qazirgi ýaqyttaǵy onyń qyzmeti – osy aýrýhanadaǵy jedel ishek ınfeksııasy bólimshesiniń meńgerýshisi.
– О́tken jyldyń jeltoqsan aıynda Qytaıdaǵy koronavırýs pandemııasy týraly aqparat taraǵannan-aq bizdiń elimizde saqtyq sharalary qolǵa alyna bastady. Al naýryz aıynda Almaty men Nur-Sultan qalalarynda naýqastar anyqtalǵan kezde Qaraǵandy oblysynda provızorlyq gospıtaldar quryla bastady. Ol jerlerge alǵashqy pasıentter jatqyzyla bastaǵanda oblystaǵy barlyq juqpaly aýrýlar dárigerleri provızorlyq gospıtaldarǵa jumys isteýge jiberildi, – deıdi B. Aspandııarov.
B.Aspandııarov sáýir aıynyń basynan bastap ınfeksııalyq gospıtaldaǵy vahtalyq kezekshilikke, ıaǵnı koronavırýspen kúrestiń alǵy shebine óz erkimen attanypty. Gospıtalda bular eki brıgadaǵa bólinip, kezekpen jumys isteıdi. Máselen, bir brıgada 14 kún vahtalyq rejimde jumys istegennen keıin demalysqa ketedi de, olardyń ornyn ekinshi brıgada basady.
– Bizdiń komandada eki dáriger, úsh medbıke jáne eki sanıtar bar. Kúnine alty-segiz saǵat naýqastardy qarap emdeımiz, odan keıin qujattardy toltyramyz da, demalýǵa ketemiz. Pasıentterge bararda qajetti epıkırovkany – indetke qarsy kostıým, qalpaq, respırator, kózildirik, eki qabat bııalaı, arnaıy aıaqqaptardyń barlyǵyn tolyq kıemiz, – deıdi Baıanbek.
Vahtalyq tásilmen jumys isteıtin Baıanbek sııaqty medısına qyzmetkerleri úshin aýrýhana aýmaǵynyń mańynan bólek korpýs qarastyrylǵan. Osy jerdegi qaıta jabdyqtalǵan palatalarda olar tamaǵyn iship, demalyp, tipti birazy osynda turyp jatyr. Vahta bitkennen keıin Baıanbekterge úıge qaıtý joq. Olar KVI-ǵa tekserilip, gospıtalda 14 kún boıy karantınde bolady. Al bizdiń keıipkerimiz bolsa, vahtaǵa osymen tórtinshi márte túsip otyr eken.
– Áý basta meniń jaqyn tanystarymnyń ózi senbeıtin. «Jurtty nege aldap júrsińder?» dep kinálaǵandary da boldy arasynda. Qazir kóbiniń kózi jetken sııaqty. Áıtse de áli kúnge deıin indettiń baryna senbeı, bárine selsoq qarap júrgender bar. Mine, osylarǵa sana berse eken dep tileımin. Al vırýs juqtyryp jatqandar óte kóp, – deıdi dáriger.
Baıanbek Aspandııarov naýryz aıynda provızorlyq gospıtalda táýekeli joǵary topta jumys istegeni úshin Prezıdent Qasym-Jomart Toqaev ýáde etken qosymsha 425 myń teńgeni tolyǵymen alǵan.
– Másele aqshada emes. Meniń áriptesterim qosymsha aqsha tólenbese de, ózderiniń mindetin adal atqaryp shyǵýshy edi. Degenmen memleket tarapynan kórsetilip jatqan qoldaý adamdy qanattandyrady, medısına qyzmetkerleri eńbeginiń laıyqty baǵalanǵany qýantady, – deıdi keıipkerimiz.
Baıanbekke qazirgi jaǵdaıda úıdegi tórt jáne bir jastaǵy bal qylyqty balalaryn kórmeý aýyr tıedi eken. Áıteýir úı-ishimen kúnde beınebaılanys arqyly habarlasyp turady. Biraq osyndaı syn saǵatta aýyr dertke shaldyqqan adamdardyń janynan tabylyp, olarǵa qoldan kelgenshe kómek kórsetip júrgenderi sharshaǵandaryn, qınalǵandaryn – bári-bárin umyttyryp jiberetinin aıtady Gıppokrat antyna berik maman aǵynan jarylyp.
QARAǴANDY