Dúnıejúzilik densaýlyq saqtaý uıymynyń Jedel baǵdarlamalar jónindegi dırektory Mıshel Raıan COVID-19 vırýsymen kúresýde tıimdi degen deksametazon dárisin qalaı jáne qandaı jaǵdaıda paıdalanýǵa bolatynyn aıtty, dep jazady Egemen.kz
"Aldymen Ulybrıtanııa birikken koroldiginiń ǵalymdaryna, osy preparatpen emdelgen barlyq pasıentterge, jáne de barlyq qatysqan adamdarǵa alǵys aıtqanymyz jón, alaıda, bul steroıdti em barysyna qosý-qospaýdy tek dáriger anyqtap, adam ózdiginen tynys ala almaıtyn asa aýyr kezde ǵana paıdalaný qajet", deıdi Mıshel Raıan.
Brıtandyq tájirıbede dárigerler dem ala almaı jatqan, tek apparat arqyly tynystaýshy naýqastarǵa deksametazondy qoldaný nátıjesinde adamdardy ajaldan aman saqtap qalǵan. Preparatty indet juqtyrǵan aýyr haldegi 2104 pasıentke berip, deksametazonmen emdelmegen 4321 aýrýmen aradaǵy kórsetkishti salystyryp baryp, steroıdtyń tıimdiligin anyqtalǵan soń ortaǵa salyndy degen DDSU ókili zertteý men taldamalyq jumystardyń jalǵasyp jatqanyn, olardyń alda ǵylymı, kásibı basylymdarda jaryq kórýi mańyzdy degen pikirin jetkizdi.
Deksametazondy aýrýdyń aldyn alamyn dep qoldanýǵa múlde bolmaıdy, olaı tek ımmýndyq júıege orasan zor zııan tıgiziledi, dárini aýrý asqynyp, vırýstyń ózinen de, odan týǵan qabynýlar ulǵaıyp, ómirge qater tóngenine kóz jetkende ǵana emge qosý kerek, deıdi DDSU.
COVID-19 barysynda tıimdiligin kórsetken sterıodtyń aǵzaǵa tıgizetin zııandy áserleri bolýy da múmkin eken. Tromboz ben qan qysymynyń ulǵaıýy, qan quramynda glıýkozanyń artyp ketýi, asqazan jarasyn týdyrý tárizdi áseri bolǵandyqtan deksametazon mólsherin tek dáriger taǵaıyndaýy tıis.