Búginnen bastap Qazaqstannyń birqatar óńiri men qalasynda karantındik shekteý sharalary kúsheıtildi, - dep habarlaıdy Egemen.kz.
Qazaqstannyń birqatar óńirinde epıdemıologııalyq jaǵdaıdyń órshýin jáne koronavırýs ınfeksııasymen aýyrý kórsetkishiniń artýyn eskere otyryp, VAK bıylǵy 20-21 maýsym, demalys kúnderine, mynadaı qosymsha shekteý sharalaryn engizý týraly sheshim qabyldady:
Nur-Sultan, Almaty, Qaraǵandy, Shymkent, Pavlodar, Ekibastuz qalalary boıynsha: saýda oıyn-saýyq ortalyqtarynyń, saýda úıleriniń, jelilik dúkenderdiń, jabyq azyq-túlik jáne basqa da bazarlardyń qyzmeti toqtatylady; qoǵamdyq tamaqtaný oryndary tek dalada ári áleýmettik araqashyqtyqty saqtap qana jumys isteýi tıis; qoǵamdyq kólikterdiń qyzmeti shekteledi; qoǵamdyq demalys oryndary: parkter, saıabaqtar, jaǵalaýlar, jaǵajaılar, akvaparkter qyzmeti toqtatylady; fıtnes-ortalyqtarynyń qyzmeti toqtatylady; 65 jastan asqan adamdardyń dalaǵa shyǵýy shektelsin. Turǵyndarynyń sany 50 myńnan asatyn eldi mekender boıynsha: qoǵamdyq oryndardyń: parkter, saıabaqtar, jaǵalaýlar, jaǵajaılar, akvaparkter jumysy toqtatylady; 65 jastan asqan adamdardyń dalaǵa shyǵýy shektelsin. О́ńirlerdiń bas sanıtarlyq dárigerleriniń qaýlylaryna sáıkes, Nur-Sultan, Almaty, Qaraǵandy, Shymkent, Pavlodar jáne Ekibastuz qalalaryna aýmaqtyq jaqyn ornalasqan týrıstik aımaqtarǵa kirýge tyıym salý al atalǵan aımaqtardaǵy adamdarǵa – áleýmettik qashyqtyqty saqtaý qajet.Úkimet basshysy óńirlerdiń ákimdikterine qysqa merzim ishinde myna máselelerdi pysyqtaýdy tapsyrdy:
medısınalyq uıymdar bazasynda qosymsha zerthanalar ashý arqyly halyqty PTR-testileýmen qamtýdy keńeıtý; aýrýhanalarda ınfeksııalyq jáne provızorlyq oryndar sanyn kóbeıtý; menshik nysanyna qaramastan, óńirde bar resýrstardy tarta otyryp, naýqastardy KT-zertteýmen qamtamasyz etý; jedel medısınalyq járdem stansııalarynyń shuǵyl jáne kezek kúttirmeıtin shaqyrýlarǵa ýaqytyly qyzmet kórsetýin qamtamasyz etý; úılerinde jatqan pasıentterge ambýlatorlyq-emhanalyq kómek deńgeıinde sapaly dınamıkalyq baqylaý jasaý (qashyqtan, mobıldi brıgadalardyń kómegimen); halyqqa belsendi aqparattyq-túsindirý jumystaryn júrgizý.