Elimizde maýsymnyń ər úshinshi jeksenbisi – medısına qyzmetkerleriniń kúni. Osy ataýly kúni adam janynyń arashashysy, aq halatty abzal jandarǵa arnaıy qurmet kórsetilip, eńbekteri erekshe elenedi. Degenmen densaýlyǵymyz syr berip, janymyz qysylǵanda kómek qolyn sozýǵa qashanda daıyn turatyn dərigerlerdi ərdaıym dəripteýimiz kerek, - dep habarlaıdy Egemen.kz.
Onyń ústine zəre-qutymyzdy qashyryp otyrǵan dəl búgingi zaýal shaqta halqymyz medısına mamandarynyń kómegine odan saıyn zərý bolyp otyr. Qyzmetine adal, elge janashyr dərigerler osynaý syn saǵatta ýaqytpen sanaspaı, eńbegin buldamaı jahandy jaılaǵan indetpen kúreste aıanbaı ter tógip júr.
Kúni-túni jarǵaq qulaǵy jastyqqa tımeı, tynymsyz jumysqa jegilip, tyǵyryqtan shyǵar jol izdep, qaýipti derttiń emin tabýǵa bar bilim-biligin, kúsh-jigerin salyp jatqan dərigerlerdiń talpynysy dətke qýat. Memleket basshysy Qasym-Jomart Toqaev qazirgi qysyltaıań kezeńde aldyńǵy shepte qyzmet etip júrgen dərigerler men medısına qyzmetkerlerine qýatty qoldaý kórsetip, zor senim bildirip otyr.
«Koronavırýs – batpandap kirip, mysqaldap shyǵatyn qaýipti dert. Degenmen biz indetke shaldyqqan adamdarǵa barlyq qajetti kómekti kórsetemiz. Búginde búkil elimiz dərigerler men medısına qyzmetkerleriniń qaısarlyǵyna tənti bolýda. Olar – adam ómirine arasha túsip jatqan búgingi kúnniń batyrlary» dedi Prezıdent.
Rasynda, adamzattyń aman dyǵyna, jumyr jerdiń tutas tyǵyna orasan qaýip tóndirip tur ǵan indetti ǵalymdardyń, dəri ger lerdiń kúshimen ǵana jeńe alamyz. Medısına salasynyń mamandary qandaı mərtebege, marapatqa bolsyn əbden laıyq. Soǵan səıkes qurmet kórsetý – ərbirimizdiń azamattyq boryshymyz.