Bıyl Almaty oblysynda «Jumyspen qamtýdyń jol kartasy-2020» baǵdarlamasyn júzege asyrýǵa 109,2 mlrd teńge qarajat bólinip otyr. Nátıjesinde aımaqtaǵy eńbek naryǵyna da suranys artyp, 23 myńǵa jýyq adam jumyspen qamtylmaq. Qazir osy maqsatta 977 joba maquldanyp, aýdandarda jumys bastalyp ketti.
Máselen, Panfılov aýdanyna «Jumyspen qamtýdyń jol kartasy-2020» baǵdarlamasy boıynsha 5,2 mlrd teńge bólingen eken. Búginde óńirdegi jumys bekitilgen 55 joba aıasynda qyza túsken. Bul aýdan kóleminde 1047 adamdy eńbekpen qamtýǵa múmkindik beredi. Qazirdiń ózinde 523 turǵyn aýdandyq jumyspen qamtý ortalyǵy arqyly jumysqa ornalasqan.
– «Jumyspen qamtýdyń jol kartasy-2020» baǵdarlamasy aýdandaǵy birqatar máseleni sheshedi. О́ńirde uzaq ýaqyt qaraýsyz qalǵan ǵımarattar áli de bar. Qazir aýyldaǵy osyndaı bir mádenıet úıine kúrdeli jóndeý júrgizip jatyrmyz. Al turǵyndar tyǵyz qonystanǵan aýylǵa jańa ambýlatorııa salynýda. Eki mektepke kúrdeli jóndeý jumysy bastalsa, basty másele bolǵan eki eldi mekende aýyz sý júıesiniń qurylys jumystary jandanýda. Kóshelerdi jaryqtandyrý, jol salý, parkterdi abattandyrý sııaqty jumystardyń barlyǵy osy baǵdarlama arqyly bólingen qarajattan jasalýda, – deıdi Panfılov aýdanynyń ákimi Talǵat О́mirálıev.
Jumyspen qamtýdyń jol kartasy aıasyndaǵy jumys Kóksý aýdanynda da jalǵasýda. Búginde óńir boıynsha 26 jobanyń tusaýy kesilip, nátıjesinde 400 adam jumyspen qamtylyp otyr. Jol kartasy boıynsha bólingen qarjy negizinen áleýmettik nysandardy kúrdeli jóndeý men jańadan salýǵa baǵyttaldy. Máselen, Kóksý aýdanyna qarasty Aınabulaq temir jol beketindegi dárigerlik ambýlatorııa ǵımaraty qulaýdyń az-aq aldynda turǵan edi. Bólingen qarjy arqyly medısına mekemesiniń ǵımaraty jańadan salynatyn boldy. 20 adamdy qabyldaýǵa arnalǵan shaǵyn emhana qurylysy 3 aıda aıaqtalyp, qoldanysqa berilmek. Aıtpaqshy, osy bekettegi shańy shyǵyp jatqan Ramazanov kóshesi de jóndelip jatyr eken. Merdiger kompanııa bul isti 1 aıda tolyqtaı ári sapaly etip aıaqtamaqshy. Sondaı-aq aýdanda 5 birdeı bilim nysanynda kúrdeli jóndeý jumysy bir mezette bastalǵan eken. Onyń qatarynda Jambyl orta mektebiniń, Z. Tamshybaı aýylyndaǵy mekteptiń sport alańyn abattandyrý, aqyn Qaban Jyraý atyndaǵy orta mekteptiń sport alańyn aǵymdaǵy jóndeýden ótkizý jáne 10 jyldyq Qazaqstan aýylyndaǵy shaǵyn fýtbol, voleıbol alańdaryn retke keltirý, Alǵabas aýylyndaǵy 1989 jyly salynǵan orta mektepti ortasha jóndeýden ótkizý sııaqty jobalar bar. Byltyr Qyzyltoǵan aýylynda 120 oryndyq mektep qurylysy bastalǵan bolatyn. Qazir jumys qaıta jandandy. Eki qabattan turatyn aýyl mektebi jańa oqý jylynda esigin aıqara ashpaq.
– «Jumyspen qamtýdyń jol kartasy-2020» baǵdarlamasy aıasyndaǵy jumystardy ortalyqtan alystaǵy aýyldardyń máselesin sheshýden bastadyq. Nátıjesinde áleýmettik nysandar jańǵyrtylyp, aýyl turǵyndaryn jumyspen qamtý jaıy da eskeriledi. Qazir aýdandaǵy birneshe aýyldyń dárigerlik ambýlatorııasyna kúrdeli jóndeý jumystary júrgizilýde. Qurylysshylar da aýyl turǵyndary arasynan tartylýda. Bastysy, qurylys jumystary aıaqtalǵannan keıin bul ambýlatorııalarǵa zamanaýı medısınalyq qurylǵylar men jabdyqtar qoıylady, – deıdi Kóksý aýdanynyń ákimi Almas Ádil.
Oblystaǵy jol kartasy aıasynda bólingen qarjynyń sharapatyn Eskeldi aýdanyndaǵy Baqtybaı aýylynyń turǵyndary da kóretin boldy. Osy aýyldaǵy Mádenıet úıi kúrdeli jóndeýden ótedi. Obaly neshik, bir kezderi eldi mekendegi eń eńseli ǵımarat bolǵan kópshilik oryn jabylyp, ýaqyt óte kele tozyp, eskirgen edi. Jaqynda 20 jyl boıyna jabyq turǵan osy Mádenıet úıin jóndeýge sheshim qabyldanypty. Oǵan «Jumyspen qamtýdyń jol kartasy-2020» baǵdarlamasy aıasynda 864,6 mln teńge qarjy bólingen eken. Jóndeý jumysyna jergilikti jumyssyzdardy tartý kózdelgen. Jalpy, Eskeldi aýdanynda jol kartasy boıynsha 59 joba júzege aspaqshy. Onyń deni aýyldardaǵy áleýmettik nysandardan turady. Osy maqsatqa 3 mlrd teńgeden astam qarjy jumsalmaq.
Al bıyl Taldyqorǵan qalasynda «Jumyspen qamtýdyń jol kartasy-2020» baǵdarlamasy boıynsha 33 joba júzege asýy tıis. Osy maqsatqa 9,9 mlrd teńge qarjy qarastyrylǵan. Qazirgi kezde oblys ortalyǵy boıynsha 30 joba júzege asyp jatyr. Ol boıynsha 474 jumys orny qurylsa, 237 adam jumyspen qamtý ortalyǵy arqyly jiberilgen. Jalpy, oblys ortalyǵynda jol kartasy boıynsha atqarylatyn is júzege asqannan keıin 5 myńnan astam jańa jumys ornyn ashý múmkin bolmaq. Onyń ishinde 4 myńǵa jýyq adam turaqty eńbek naryǵyna qatysýshy atanady. Qazirdiń ózinde 1284 adam jol kartasy boıynsha bastalǵan jumysqa tartylǵan. Jalpy, baǵdarlama aıasynda Taldyqorǵan qalasy boıynsha 37 joba júzege asady dep josparlanǵan eken.
Aıtpaqshy, jol kartasy boıynsha Tekeli qalasyna da qomaqty qarajat bólingen eken. Shaǵyn qalada bıyl 13 joba júzege asyp, oǵan 1 mlrd 837 mln teńge qarjy jumsalmaq. Nátıjesinde 408 jańa jumys oryny qurylady degen senim bar. Qazir bastalǵan iske jumyspen qamtý ortalyǵy arqyly 216 adam joldama alyp otyr.
– «Jumyspen qamtýdyń jol kartasy-2020» baǵdarlamasy aıasynda alǵashqy 2 joba iske qosyldy. Onyń biri teńiz deńgeıinen 1200 metr bıiktiktegi taý basyna Tý iletin tuǵyr ornatý bolsa, ekinshisi qala kelbetin bıikten baqylaıtyn alań aınalasyn abattandyrý jumysy. Alǵashqy joba boıynsha 6 mln teńgeden astam qarjy jumsalyp, 5 adam jumyspen qamtyldy. Al ekinshi joba boıynsha taǵy 12 adam jumys istep, alańdaǵy qurylys jumysyna 8 mln teńge bólindi. Bul baǵyttaǵy jumys jandana beredi, – deıdi Tekeli qalasynyń ákimi Bahtııar О́nerbaev.