Parlament Májilisi «Parlament sózi» arnaıy syılyǵynyń qorytyndysyn shyǵaryp, jeńimpazdardyń esimderin jarııalady, dep habarlady Májilistiń baspasóz qyzmeti.
Quramyna Májilis depýtattary, kórnekti qoǵam qaıratkerleri, partııalar ókilderi engen komıssııanyń sheshimimen bıyl jeti atalym boıynsha jeńimpazdar anyqtaldy.
Májilis Tóraǵasy Nurlan Nyǵmatýlın «Parlament sózi» syılyǵynyń jeńimpazdarymen qatar, otandyq buqaralyq aqparat quraldary ókilderiniń barlyǵyn kásibı merekesimen quttyqtady.
«Parlamenttik jýrnalıstıkany damytýǵa qosqan úlesi úshin» atalymynyń laýreattary – «Qazaqstan dáuiri» gazetiniń bas dırektory Sáýle Meshitbaeva jáne «Karavan» gazetiniń bas redaktory Igor Shahnovıch;
«Úzdik televızııalyq sıýjet úshin» atalymynyń laýreattary – «Habar» telearnasynyń tilshisi Indıra Jylqyaıdarova jáne «Birinshi arna» «Eýrazııa» tilshisi Svetlana Penkova;
«Úzdik basylym jarııalanymy úshin» atalymynyń laýreattary – Temir Qusaıyn («Egemen Qazaqstan») jáne «Lıter» gazetiniń ujymy;
«Úzdik ınternet jáne radıomaterıal» atalymynyń laýreattary «Abai.kz» aqparattyq portaly jáne Serik Sábekov («Kazinform»);
«Arnaıy reportaj» atalymynyń laýreattary – «Qazaq radıolary» men «Habar 24» telearnasynyń tilshisi Mark Brıýshko;
«Úzdik vıdeo jáne fotomaterıal úshin» atalymynyń laýreattary «Nur Media» fototilshisi Sovetbek Maǵzumov jáne «Habar» telearnasynyń bas operatory Edil Ermekbaev boldy.
Májilis Tóraǵasy Nurlan Nyǵmatýlınniń bastamasymen bıyl «Parlament sózi» arnaıy syılyǵy» ómirden erte ketken tanymal jýrnalıst Beısen Quranbekke berildi.
2016 jyldan beri uıymdastyrylyp kele jatqan syılyqtyń tapsyrylýy bıyl koronavırýs pandemııasyna qatysty birqatar ózgeriske ushyrady. Syılyqty saltanatty túrde tapsyrý rásimi kúzgi parlamenttik sessııaǵa josparlanyp otyr.