Búgin Almaty qalasy Qoǵamdyq densaýlyq basqarmasynyń basshysy Kamaljan Nadyrov koronavırýsy bar aýyr naýqastardy emdeý úshin qoldanylatyn plazmany tapsyrdy, - dep jazady Egemen.kz
Kamaljan Nadyrovtyń aıtýynsha, Almatyda indet juqtyrý jalǵasýda, sondaı-aq koronavırýstyń aýyr túrimen aýyratyn naýqastar sany da artty.
"Búgin men koronavırýsy bar aýyr naýqastardy emdeý úshin qoldanylatyn plazmany tapsyrdym, – dedi Almaty qalalyq basqarma basshysy, – О́zderińiz biletindeı, men osy ınfeksııamen aýyrdym jáne meniń plazmam aýrýdyń aýyr túrimen aýyratyn pasıentterdi emdeýge kómektesedi dep oılaımyn. Juqtyrǵandar úshin qoldanylatyn bul ádis tiri vaksınanyń áserine ıe jáne kópshilikke saýyǵyp ketýlerine kómektesedi. Donor bolý – árbir adamnyń paryzy. Qazirgi ýaqytta Almatyda 2 myńnan astam adam emdeýden jazylyp shyqty. Men árbir aýyryp jazylǵan adamdy Covid-19 antıdenesine qan tapsyrýǵa shaqyramyn, osylaısha koronavırýstan emdelip jatqan kóptegen adamdarǵa, eń aldymen aýyr jaǵdaıdaǵy naýqasqa kómektesýge bolady. Prosedýra aýyrtpalyqsyz jáne qaýipsiz ótedi. Dál qazirgi jaǵdaıda – vırýspen kúres jaǵdaıynda barlyǵymyz birigýimiz kerek. Memleket juqpaly aýrýmen kúresýde úlken kómek kórsetýde. Biz barlyq qıyndyqtardy laıyqty túrde jeńe alamyz dep senemin.
Qazaqstanda koronavırýspen aýyrǵandardyń antıdenelerin alý prosesi bastalǵanyn aıta ketken jón. Bul prosedýrany qalaýshylar Almaty qalasynyń Respýblıkalyq qan ortalyǵynda ótkize alady.
Respýblıkalyq qan ortalyǵynyń dırektory Dılıaver Bekırovtyń aıtýynsha, bir aı ishinde 24 adam plazma tapsyrýǵa ótinish bildirgen, biraq tek úsheýi ǵana donor boldy, sebebi olarda COVID-19 antıdenelerdiń joǵary tıtri anyqtalǵan. Kamaljan Talǵatuly barlyq belgiler boıynsha donor retinde sáıkes keldi, óıtkeni onyń aǵzasynda antıdenelerdiń joǵary tıtri anyqtaldy.
Plazmaferez (plazma daıyndaý) prosedýrasy barysynda bir donordan 600 ml plazma alady, juqtyrǵan adam úshin 200 ml jetkilikti. Plazmanyń mundaı kólemin alý ǵylymı negizdelgen bolyp tabylady jáne donorǵa eshqandaı zııan keltirmeıdi.
Bul plazmanyń áseri passıvti ımmýndaýǵa negizdelgen, ıaǵnı daıyn antıdeneler qanǵa aýystyrylady jáne osylaısha pasıenttiń vırýstaryn beıtaraptandyrady.
Qazirgi ýaqytta dárigerler qoldanatyn barlyq preparattar – bakterııaǵa qarsy nemese qabynýǵa qarsy tek janama sıpatqa ıe ekendigin esterińizge salamyz. Sondyqtan da, emdeýdiń basqa ádisterin qoldaný qajet bolady.
Emdeýdiń bul ádisin qoldaný jaı-kúıi aýyr naýqastardyń sanyn azaıtýǵa kómektesedi dep úmittenemiz.