Reseıdiń 28 qalasynda, sonyń ishinde qaharman qalalary men áskerı okrýgter, armııa jáne armııa korpýstary, flottary ornalasqan qalalarda Jeńistiń 75 jyldyǵyna arnalǵan parad ótip jatyr, - dep habarlaıdy TASS agenttigi.
Reseıdiń birqatar qalasynda merekelik is-sharalar basqa formatta uıymdastyrylǵan. Keı aýdandarda epıdemıologııalyq jaǵdaıǵa baılanysty bılik sheshimimen sherýler ótkizilmeıtin boldy nemese parad kórermensiz ótedi.
Áskerı paradtar Chıta jáne Belogorsk qalalarynda ótti. Al sherýler Shyǵys áskerı okrýginiń jeti qalasynda ótedi dep josparlanǵan. Oǵan 21 myń adam, 600-den asa dońǵalaqty jáne shynjyr tabandy tehnıka, avıasııa qatysady.
Jeńistiń 75 jyldyǵy qurmetine oraı uıymdastyrylyp jatqan saltanatty sharaǵa qatysý úshin ózge elderdiń kóshbasshylary Máskeýge kelip jetti.
Reseı astanasyna Abhazııa Prezıdenti Aslan Bjanııa, Qazaqstan Prezıdenti Qasym-Jomart Toqaev, Moldavııa Prezıdenti Igor Dodon, Serbııa Prezıdenti Aleksandr Výchıch, О́zbekstan Prezıdenti Shavkat Mırzıeev, Belarýs Prezıdenti Aleksandr Lýkashenko keldi. Sondaı-aq munda Bosnııa men Gersegovına Prezıdıýmynyń serbııalyq múshesi Mılorad Dodık, Qyrǵyzstan Prezıdenti Sooronbaı Jeenbekov, Tájikstan Prezıdenti Emomalı Rahmon, Ońtústik Osetııa Prezıdenti Anatolıı Bıbılovtiń kelýi kútilýde.
Eske sala keteıik, keshe Memleket basshysy Qasym-Jomart Toqaev Reseı Federasııasynyń Prezıdenti Vladımır Pýtınniń shaqyrýymen Máskeýge jumys saparymen bardy. Búgin ol Nur-Sultan ýaqyty boıynsha saǵat 13:00-de Qyzyl alańda Jeńistiń 75 jyldyǵyna arnalǵan áskerı paradqa qatysady.
Sonymen qatar Qasym-Jomart Toqaev «Belgisiz soldat» qabirine gúl shoǵyn qoıady jáne Jeńistiń 75 jyldyǵyna arnalǵan saltanatty qabyldaýǵa qatysady.
Qazirgi aýyr epıdemıologııalyq ahýalǵa baılanysty Máskeý saparynyń aldynda Prezıdent josparly túrde koronavırýsqa test tapsyrdy. Qasym-Jomart Kemeluly buǵan deıin de medısınalyq hattamaǵa sáıkes, únemi tekserýden ótip keledi.