Mádenıet jáne sport mınıstri A.Raıymqulova ústimizdegi jyldyń 26 maýsymy kúngi saǵat 16:00-de "Memlekettik til jáne BAQ-2020" respýblıkalyq baıqaýy jeńimpazdaryn Nur-Sultan qalasy, Saýran kóshesi, 7/a mekenjaıy boıynsha onlaın rejıminde marapattaıdy, - dep habarlaıdy Egemen.kz.
Qolyna qalam men mıkrofon ustaǵan jýrnalısterdiń dástúrli dodasyn Qazaqstan Respýblıkasy Mádenıet jáne sport mınıstrliginiń Til saıasaty komıteti jáne Shaısultan Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵy jyl saıyn uıymdastyrady.
Baıqaý Erejesiniń talaptaryna sáıkes, usynylǵan jýrnalıstik eńbekterdiń mazmuny – memlekettik tildiń qyzmet etý aıasyn keńeıtý, mártebesin nyǵaıtý, qazirgi ahýalyn taldaý jáne oǵan monıtorıng júrgizýge baǵyttalýy shart.
Jeńimpazdar "Úzdik maqala", "Úzdik telebaǵdarlama", "Úzdik radıobaǵdarlama", "Úzdik saıt maqalasy" nomınasııalary boıynsha marapattalady.
Konkýrsqa elimizdiń túkpir-túkpirinen 56 jýrnalıst qatysyp, 116 materıal talqyǵa túsip otyr.
Atalym boıynsha jiktese, tómendegishe bolyp shyǵady:
"Úzdik maqala" boıynsha qatysýshylar sany – 24, materıaldar sany – 49; "Úzdik saıt maqalasy" boıynsha qatysýshylar sany – 12, materıaldar sany – 25; "Úzdik radıobaǵdarlama" boıynsha qatysýshylar sany – 11, materıaldar sany – 23; "Úzdik telebaǵdarlama" boıynsha qatysýshylar sany – 9, materıaldar sany – 19.Elimizge belgili qalam qaıratkerleri men tanymal jýrnalısterden qurylǵan Qazylar alqasynyń jaqynda ótken otyrysta qyzý talqylaýdan keıin qabyldaǵan ortaq sheshimi sol kúni saltanatty túrde jarııa bolady.
"Júzden – júırik, myńnan – tulpar" shyqqan bıylǵy jeńimpazdardyń esimin qalyń jurtshylyq nazaryna jetkizýge asyǵaıyq!