Jambyl oblysynda tótenshe jaǵdaı kezinde elimizde qolǵa alynǵan "Biz birgemiz!" aksııasy aıasynda jalǵyzbasty qart adamdarǵa, az qamtamasyz etilgen jáne kópbalaly otbasylarǵa jáne basqa da muqtaj azamattarǵa áleýmettik paketter usynýǵa atsalysqan eriktiler men belsendi nurotandyqtarǵa búgin Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń Alǵys hattary tabys etildi, - dep habarlaıdy Egemen.kz.
Jıynǵa Jambyl oblysynyń ákimi Berdibek Saparbaev arnaıy qatysyp, óziniń pikirin bildirdi. "Nurotandyqtar árqashan azamattarǵa jaqyn bolýǵa, qıyn ýaqytta qoldaý kórsetip, kómektesýge tyrysyp keledi. Buǵan deıin partııa "Kedergisiz keleshek", "Baqytty otbasy", "Ardagerlerdi ardaqtaıyq" aksııalaryn ótkizgen bolatyn. "Biz birgemiz!" olardyń jalǵasyna aınaldy. Eriktilerdiń arqasynda aksııa aýqymy keńeıe tústi. Qarttarǵa erekshe qamqorlyq qajet. Osy oraıda jas belsendiler olarǵa tamaq pen dári-dármekterdi jetkizip berip, úı sharýashylyǵyna qolǵabys jasaýda. Erikti-dárigerler medısınalyq kómek kórsetýde. Bul qazaqstandyqtardyń otandastaryn qıyn jaǵdaıǵa qaldyrmaıtyndyǵynyń jáne árqashan kómek qolyn sozýǵa daıyn ekendiginiń dáleli", dedi Berdibek Saparbaev.
Atalǵan aksııa Elbasynyń bastamasymen elde tótenshe jaǵdaı kezinde muqtaj jandarǵa kómek kórsetý maqsatynda qolǵa alynǵan bolatyn. "Birgemiz – Jambyl oblysy" qoǵamdyq qorynan kómek kórsetýdiń birinshi jáne ekinshi kezeńderi boıynsha 838 mıllıon teńge bólingen. Bul qarajatqa 16,7 myń adamǵa qoldaý kórsetilgen. Al, úshinshi kezeń boıynsha Baızaq, Jambyl, Moıynqum, Sarysý, Talas jáne Shý aýdandary boıynsha 10,2 myń adam qamtylyp, olarǵa 511 mıllıon teńgeniń kómegi kórsetilgen. Oblys boıynsha barlyǵy 27 myń jambyldyqqa 50 myń teńgeniń birjolǵy tólemi usynylǵan. Endi aǵymdaǵy jyldyń shilde aıynda tórtinshi kezeń bastalady. Atalǵan kezeń aıasynda 337 mıllıon teńge kóleminde 6,7 myń turǵynǵa kómek kórsetý josparlanýda. Sondaı-aq, 14286 otbasyn birinshi kezektegi qajetti azyq-túlikpen qamtamasyz etý úshin 293 mıllıon teńge bólingen. Bul jumystardyń barlyǵy eriktilerdiń arqasynda sátti atqarylǵan. Sonymen qatar, Nur Otan partııasynyń aýdandyq fılıaldarynyń janynan eriktiler qozǵalysy qurylyp, oǵan ıgi iske atsalysýǵa yntaly azamattar tartylǵan. Olar azyq-túlik sebetterin tıisti meken-jaılar boıynsha jetkizip berýdi, járdemaqy alýǵa nıettilerdiń tizimin ázirleýdi uıymdastyryp, turǵyndarǵa koronavırýstyq ınfeksııanyń aldyn alý týraly aqparattyq paraqshalar taratty.
"Qazaq halqynda asar degen dástúr bar. Onda adamdar birigip, úlken jumystardy shynaıy nıetpen jáne aqysyz jumyla oryndaıdy. Kóshpeliler ejelden-aq bir-birine jáne álsizderge qolushyn sozyp, birge úıler salyp, túrli is-sharalar uıymdastyrǵan. Birigip qana aýqymdy tirlikterdi tyndyra alatyndyqtaryn áý bastan túsingen. Sol sııaqty búgingi tańda eriktilerdiń birlik, qaıyrymdylyq jáne meıirimdilik qaǵıdalaryn basshylyqqa alýy qýantady. Bul urpaqtar sabaqtastyǵynyń jarqyn kórinisi. Jas býyndy eriktiler qozǵalysyna odan ári tarta túsý úshin "Jas Ulan" jáne "Jas Qyran" balalar men jasóspirimder uıymdarynyń jáne "Jas Otan" Jastar qanatynyń qyzmetine jańa serpin berý kerek», dedi Berdibek Saparbaev. Jıyn barysynda eriktiler de Elbasy Nursultan Nazarbaevqa artqan senimi úshin alǵystaryn bildirdi. Al, Nur Otan partııasy oblystyq fılıaly janyndaǵy "Jas Otan" jastar qanatynyń tóraǵasy Ýálıhan Bolatbek eriktilerdiń tájirıbesi týraly aıta kele, Túrkistan oblysynyń Maqtaaral aýdanyndaǵy eki kúndik saparyna erekshe atap ótti. Qıyn jaǵdaı kezinde 20 belsendi Maqtaaralǵa 15 tonna gýmanıtarlyq kómek jetkizgen. Sonymen qatar, Jambyl oblystyq "Jibek joly jastary" eriktiler qozǵalysynyń tóraǵasy Aıaýlym Rasylhan qazirgi qıyndyqtar jaqsylyqqa jany qushtar jastardy bir arnaǵa toptastyrǵanyn atap ótti.
Jambyl oblysy