Mańǵystaý oblysynda avtomobıl joldary salasyndaǵy iri respýblıkalyq «Jetibaı – Jańaózen» jobasyn iske asyrý sharalary aıaqtalýǵa jaqyn. Joldyń 2 ýchaskesiniń birindegi jumystar osy jyldyń naýryzynda aıaqtalǵan bolatyn.
Qaıta jańartý jumystary 2018 jyldan beri Azııa damý banki qarajatynyń esebinen iske asyrylýda. «Akkord/Aqjol Qurylys» BK jáne «Cengiz Insaat Sanayi ve Ticaret A.S» kompanııalary» eki jyl ishinde 976 adamdy jumysqa tartsa, jol-qurylys tehnıkasynyń 575 birligin jumyldyrdy.
Búgingi tańda joldyń 0-38 shaqyrymdary arasyndaǵy ýchaskesinde 20 shaqyrymdyq kedergilik qorshaýlardy ornatýdan basqa jumystardyń barlyǵy oryndalǵan. Jospar boıynsha bul jumystar 2020 jylǵy 30 maýsymǵa qaraı aıaqtalady dep kútilýde. 35-73 shaqyrymdar arasyndaǵy jol ýchaskesiniń qurylys jumystarynyń barlyǵy aıaqtalǵan.
Jol qaıta jańartý jumystarynan ótken soń, joldyń 68,6 shaqyrymy paıdalanýǵa beriledi. Onyń 57,4 shaqyrymy – I tehnıkalyq sanattaǵy, 11,2 shaqyrymy – II tehnıkalyq sanattaǵy joldar bolmaq. Budan bólek, munda 2 jol ótpesi, 25 sý ótkizgish qubyr jáne mal ótpeleri ornatylǵan.
Aıta ketý kerek, Mańǵystaý oblysynda jaqsy jáne qanaǵattandyrarlyq jaǵdaıdaǵy respýblıkalyq mańyzy bar joldardyń úlesi 95,2% quraıdy. 2017 jyly munda Beıneýden Aqtaý qalasynyń teńiz portyna deıingi aralyqta jatqan «Beıneý-Aqtaý» avtomobıl jolyn qaıta jańartýǵa qatysty iri jobany júzege asyrý sharalary aıaqtalǵan edi. Atalǵan joldyń uzyndyǵy 430 shaqyrymdy quraıdy.