Mańǵystaýda koronavırýs juqtyrǵandar sany kóbeıip barady. Búginde oblys boıynsha koronavırýs ınfeksııasymen 830 adam tirkelgen bolsa, onyń ishinde 462 adam emdeldi. Sımptomsyz túrimen 456 adam tirkelip, 192-si jazyldy.
Aqtaý qalasyndaǵy juqpaly aýrýlar stasıonarynda 70 adam jatyr, 4 adam óte aýyr halde. Beıneý aýdandyq juqpaly aýrýlar stasıonarynda – 14, Jańaózen qalasynda – 27, Mańǵystaý aýdanynyń Shetpe aýylynda – 3, Túpqaraǵan aýdanynyń stasıonarynda 1 adam em qabyldaýda. Olardyń birqatary saýyǵyp shyqsa, 3 adam qaıtys boldy. Pnevmonııa aýrýynyń órshýi de «jyǵylǵanǵa judyryq» bolyp tur. Al dárigerlerdiń, medbıkeler men sanıtarlardyń jetispeýi – óńirde kúrdeli máseleni alǵa tartady.
Oblystyq densaýlyq saqtaý basqarmasynyń málimetine súıensek, búginde óńirde pnevmonııa dıagnozymen 789 adam tirkelgen. Jaǵdaıy aýyr naýqastardyń sany – 71, onyń ishinde 13-i óte aýyr kúıde jatyr. Búginge deıin pnevmonııa dıagnozynan 74 adam qaıtys boldy. Sońǵy táýlikte stasıonarlarǵa 144 adam túsip, bir táýlik ishinde 19 naýqas qaıtys boldy. Qazirgi ýaqytta oblystyq aýrýhanada qosymsha provızorlyq stasıonar ashylǵan «V» blogynda jumys isteý úshin medbıkeler men sanıtarlar qajet.
Birinshi kezekte reanımatologtar jetispeıdi. Kem degende 25 dáriger qajet. Sondaı-aq apta sońynda Aqtóbe oblysynan 20 dárigerlik desant keledi dep kútilýde.
Jaǵajaıdaǵy tennıs ortalyǵynda 150 tósektik qosymsha provızorlyq stasıonar ashyldy. Rezerv retinde ashylǵandyqtan ázirge oǵan pnevmonııamen aýyratyn adamdardyń eshqaısysyn qabyldap jatqan joq. Jumys istep turǵan provızorlyq stasıonarlar pnevmonııa dıagnozy bar naýqastardy qabyldaýǵa úlgerip jatyr. Naýqastar qalalar men aýdandarda ornalasqan provızorlyq stasıonarlarǵa jatqyzylýda. Aqtaý qalasyndaǵy provızorlyq stasıonar oblystyq týberkýlezge qarsy dıspanserdiń bazasynda 100 naýqasqa arnalyp uıymdastyrylsa, psıhıkalyq densaýlyq ortalyǵy ǵımaratynyń bazasynda 100 kereýettik provızorlyq stasıonar ashyldy. Qosymsha 150 orynǵa arnalǵan provızorlyq stasıonar Mańǵystaý oblystyq aýrýhanasy bazasynda ashyldy. Psıhıkalyq densaýlyq ortalyǵy ǵımaratynyń bazasynda jansaqtaý bólimshesinde 9 oryn ashyldy.
Quzyrly oryndardyń habarlaýynsha, Mańǵystaý oblysynyń medısınalyq mekemelerinde tynys alý apparattarynyń jetispeýshiligi oryn alǵan joq. Qazirgi ýaqytta barlyǵy 92 ókpeni jasandy jeldetý apparaty bar. NCOC kompanııasy demeýshilik tanytyp, medısınalyq mekeme taǵy 10 apparatqa tolyqty. «Mańǵystaýmunaıgaz» AQ da dál osyndaı 20 apparatqa qoldaý kórsetti. Sondaı-aq «Qarajanbasmunaı» AQ kompanııasy da 20 dana О́JJ apparatyn beredi dep kútilýde. Budan bólek, densaýlyq saqtaý basqarmasy úkimettik rezerv qarajaty esebinen, ıaǵnı respýblıkalyq bıýdjetten qosymsha 40 apparat satyp alady. Osylaısha aımaqta atalǵan apparattyń jetispeýshiligi máselesi joq. Sonymen qatar oblys ákimdiginde ótinim maquldanyp, bir aı ishinde óńirdiń medısınalyq mekemelerine ottegi konsertrattary kelip túsedi dep kútilýde.
– Jaman aıtpaı jaqsy joq, jaǵdaı kúrdelenip, naýqastar sany artatyn bolsa, oblys deńgeıinde áleýmettik nysandarda ýaqytsha provızorlyq ortalyqtar jasaqtaýǵa múmkindik bar. Barlyq provızorlyq stasıonarlar qajetti medısınalyq qural-jabdyqtarmen, qorǵanysh quraldarymen jáne dári-dármektermen qamtylady. Ol jerde jumys isteıtin dárigerlerge jaǵdaı jasalyp, qonaqúılerge ornalastyrylmaq», deıdi oblys ákimdiginiń ókilderi.
Mańǵystaý oblysy