Zamanaýı avtorlardyń qalamaqysy qansha?
Byltyr Forbes jýrnaly álemdegi eń kóp qalamaqy alatyn 100 ataqty adamnyń reıtıngin jasaǵan bolatyn. Onyń ishinde eki-aq jazýshy bar.
Áıgili basylym aıdaryndaǵy 30-oryndy Garrı Potterdiń qyzyqty oqıǵalaryna qurylǵan romandar serııasyn jazǵan brıtandyq avtor Djoan Roýlıng alyp otyr. Onyń ótken jylǵy tabysy 92 mıllıon dollardy quraǵan. Bul tasyǵan baılyqtyń bári Garrı Potterdiń arqasy deýge sený qıyn. Degenmen, ol kitap 500 mıllıon danadan asyp jyǵylyp basylyp shyqqany esimizde. Tipti tırajy jaǵynan Bıblııadan da ozdy. Biraq Roýlıng sybaǵasynyń eń úlkeni – franshızalar men pesa qoıylymdarynyń tólemi bolyp shyqty.
Tabysty romanıstiń teatr sahnasynda qoıylǵan pesasy bir aptada 2,3 mıllıon dollar tabys ákelgen. Bul Brodveı tarıhyndaǵy rekordtyq kórsetkish. Al Garrı Potterdiń ǵajaıyp álemi týraly onynshy fılm – «Fantastıkalyq janýarlar: Grın-de-Valdtyń qylmysy» kúlli álem boıynsha 650 mıllıon dollar qarjy jınaǵan.
Forbes-tiń 28-ornynda eń kóp qalamaqy alatyn amerıkalyq avtor Djeıms Patterson 70 mıllıon dollar kirispen tur. Onyń kitaptarynyń 5,5 mıllıonnan asa danasy satylǵan.
Koroldik ádebı uıymnyń (Royal Society of Literature) zertteýlerine súıensek, Ulybrıtanııada 70 paıyzǵa jýyq kásibı jazýshylar 2018 jyly 10 myń fýnt sterlıng tabys tapqan.
Al irgemizdegi Reseıde joǵaryda atalǵan aýqymdy kórsetkishter qaıtalanbaıdy. Reseıde qazir bir kitap orta eseppen 4,5 myń tırajben jaryq kórip otyr. Tek tanymal detektıvshi Darıa Donsovanyń ǵana tırajy jalpy alǵanda 200 mıllıon danaǵa jetedi.
Jazýshylyqqa jańa qadam basqan avtordyń qalamaqysy 25 myń rýblden aspaıdy. Al álemdik arenaǵa shyǵyp júrgen jazýshylarǵa mıllıon tólenýi de ábden múmkin. Máselen, jańaǵy Donsovanyń bir shyǵarmasynyń qalamaqysy 140 myń dollarǵa deıin jetedi. Detektıv janryndaǵy romandarmen tanylǵan Aleksandra Marınınaǵa 100 ben 150 myń dollardyń arasynda tólenip júr. Budan bólek Borıs Akýnın ortasha eseppen 30 myń dollar, al Tatıana Ýstınova 25 myń dollar kóleminde qalamaqy ala alady.
Isıgýro: Nobelden keıingi alǵashqy kitap
Osydan týra úsh jyl buryn Ádebıet salasy boıynsha Nobel syılyǵy «romandaryndaǵy alapat sezim qýaty álem men adam arasyndaǵy tylsym baılanystyń tuńǵıyǵyna jol ashqany úshin» tegi japondyq, Brıtanııa jazýshysy Kadzýo Isıgýroǵa berilgen edi. Jer júzindegi nómiri birinshi syılyqtyń laýreattaryn synshyl qaýym jyl saıyn ejelgi dástúr boıynsha qyzý talqyǵa salyp jatatyn. Biraq dál sol jyly Isıgýrony ádebıetshilerdiń deni bul mártebege ábden laıyq dep sanady. Al Shved akademııasynyń turaqty hatshysy Sara Danıýs: «Djeın Ostın men Frans Kafkany aralastyryp, oǵan azdap Prýsty qossańyz, Kadzýo Isıgýro shyǵady» dep avtordyń oqyrmanǵa málim jazý tásilin jarııa qylǵan edi. Mine, endi sol Isıgýronyń tvorchestvosynda úlken jańalyq bolǵaly tur.
2021 jyldyń naýryzynda Kadzýo Isıgýronyń jańa romany jaryqqa shyqpaq. Aıta keteıik, bul avtordyń Nobel syılyǵynan keıingi alǵashqy kitaby. «Klara men kún» (Klara and the Sun) dep atalatyn romanda Klaranyń oqıǵalary, «jasandy dostyń» «erekshe baıqampaz qabiletteri» baıandalady. Sý jańa shyǵarmany basýǵa daıyndap jatqan Faber baspasy: «Klaraǵa múmkindik týǵan kezde adamdardyń bergen ýádesine kóp sene bermeý kerek ekenin eskertedi», dep roman sıýjetine pikir bildirdi.
Amazon kitap dúkeni keler jyly oqyrman qolyna tıetin Isıgýro romanynyń qaǵaz nusqasy 27,95 dollardan satylady dep boljap otyr.
Jupar ańqyǵan kitaptar
Kitapta ıis bola ma? Estimegen elde kóp. Bolady eken.
MyBook kitap ortalyǵy men ıissý shyǵaratyn Demeter kompanııasy klassıkalyq shyǵarmalardyń jelisimen ıissýlar kolleksııasyn jasap shyǵardy. Hosh ıisterdiń bul toby MyBook Perfumes dep atalyp otyr.
Atalǵan jobaǵa 14 «parfıýmerlik tom» kirgen. Onyń jeteýi orys klassıkasyna arnalsa, qalǵan jartysy shetel ádebıeti negizinde jasaldy. Mundaǵy ár ıissý bir kitaptyń kóńil kúıin beredi. Máselen, «Alqyzyl jelkender» (Aleksandr Grın) povesinen teńiz ben salqyn leptiń ıisi shyǵady. Al «Daýyl» (Aleksandr Ostrovskıı) pesasynan jerdiń syzyn sezinesiz. Sondaı-aq «Alısa ǵajaıyptar elinde» (Lıýıs Kerroll) birden aǵylshyn sháıin eske túsiredi.
Uıymdastyrýshylardyń sózinshe, ıissý jasaýda eń qıynǵa soqqan shyǵarma – Lermontovtyń «Bizdiń zamannyń qaharmany» bolypty. «Bizge, bir jaǵy óte tanymal ıis, al bir jaǵynan – Pechorınniń harakteri sııaqty kúrdeli ári qubylmaly ıis kerek boldy. Nátıjesinde, jupar sýdyń hosh ıisiniń qanyq kompozısııasy sekildi ótkir ıis shyǵara aldyq. Bul patsha áskerindegi ofıser obrazynan, sulýlyq pen qaýipten, dramalyq oqıǵalardan bir úzik syr bere alatyndaı», dedi olar.
Avtorlyq ıllıýstrasııalary bar kitap ıissýlarynyń kolleksııasy 27 maýsymǵa deıin satylmaq.