Túrkistan oblysy boıynsha 21-30 maýsym aralyǵynda 101 talapker kireberiste tyıym salynǵan zattardy alyp kirmek bolǵandyqtan testileýge qatystyrylmady. UBT erejesin buzǵany úshin 134 testilenýshi aýdıtorııadan shyǵarylyp, testileý nátıjesi joıylǵan. Bul týraly Túrkistan oblysynyń adamı áleýetti damytý basqarmasynyń baspasóz hatshysy Azamat Ospanov aıtyp ótti.
Salalyq bilim basqarmasy ókiliniń aıtýynsha, bıylǵy UBT kezinde jyldaǵydaı zań buzýshylyq oryn alǵan. Alaıda byltyrmen salystyrǵanda kórsetkish tómen. Túrkistan oblysynda 200 bitirýshi UBT kezinde túrli quıtyrqylyqqa barmaq bolǵan. Talapkerdi tekserý kezinde emtıhanǵa alyp kirýge tyıym salynǵan zattar tabylǵan. Bul týraly testileý barysyn talqylaýǵa arnalǵan brıfıngte Túrkistan oblysy boıynsha bilim salasynda sapany qamtamasyz etý departamenti basshysynyń orynbasary Qudaıbergen Sherbaev aıtyp berdi. Sondaı-aq Otyrar aýdany, Sháýildir aýylynda UBT kezinde 10 mınýtqa beıne-translıasııa úzilgen.
Al Túlkibastaǵy memlekettik komıssııa quramyna engen bilim bóliminiń bas mamany men memlekettik komıssııa tóraǵasynyń aýyryp qalýyna baılanysty melekettik komıssııa tóraǵasy mindeti bilim bóliminiń bas mamanyna júktelgen. Alaıda atalǵan memlekettik qyzmetkerler oqýshylarǵa kómek berip jatqanyn UQK qyzmetkerleri beınejazbaǵa túsirip alǵan. Jasalǵan zańbuzýshylyq boıynsha ishki ister organdarynyń tergeý toby shaqyrylyp, tıisti sharalar júrgizilýde. Degenmen testileý pýnktterinde sanıtarlyq talaptardyń saqtalýy úshin oblys kóleminde daıyndyq qarqyny báseńdegen emes. Iаǵnı sanıtarlyq normalardyń saqtalýy qatań baqylaýǵa alynǵan.
«Túrkistan oblysynda 26-28 maýsym aralyǵynda 13 aýdan-qalada jáne Saıram aýdany, Shymkentte ornalasqan Silkway ýnıversıtetindegi pýnktterde UBT ótkizildi. Atalǵan úsh kúnde UBT tapsyrýǵa ótinish bergen oqýshylardyń 6714-i test tapsyrý kerek bolatyn. Biraq 132 oqýshy testileýge kelmedi. 28 oqýshy kireberiste tyıym salynǵan zattardy alyp kirmek bolǵandyqtan testileýge kirgizilmegen. Barlyǵy 6554 oqýshy UBT-ǵa qatysyp, onyń ishinde UBT erejesin buzǵany úshin 39 oqýshy aýdıtorııadan shyǵarylyp, testileý nátıjesi joıyldy», deıdi Azamat Serikbaıuly.
Bıyl UBT óte kúrdeli kezeńde ótip jatyr. DDU Covid-19 vırýsyn pandemııa dep jarııalanýyna baılanysty elimizdegi bilim báıgesine memlekettik deńgeıde kóńil bólinýde. Bilim jáne ǵylym mınıstrliginiń málimetinshe, elimizde Ulttyq biryńǵaı testileýdiń alǵashqy kúninde 160 talapker ereje buzǵan. UBT-da ereje buzǵandardyń basym bóligi Shymkent jáne Túrkistan oblysynda tirkeldi.
Túrkistan oblysy