«Naǵyz qazaq – dombyra» desek, sol qazaqtyń qazaqylyǵyn tanytatyn tushymdy is-sharalar Ulttyq dombyra kúni qarsańynda da ónersúıer qaýymdy qýantty. Qýanyshtyń sebebi – mektep oqýshylaryna arnalǵan «Dombyra» oqýlyǵynyń tusaýkeseri.
О́tken jumada Halyqaralyq Túrki akademııasynyń uıymdastyrýymen Ulttyq dombyra kúnine arnalǵan «Dombyra mádenıeti: dástúr sabaqtastyǵy jáne bilim berýdegi máseleler» atty onlaın-konferensııa ótti. Alqaly jıyn aıasynda Halyqaralyq Túrki akademııasy Memleket basshysynyń tikeleı tapsyrmasy boıynsha daıyndap shyǵarǵan «Dombyra» oqý quralynyń tusaýkeser rásimi ótti. О́skeleń urpaqqa arnalǵan oqýlyqtyń avtory belgili kúıshi, Qazaq ulttyq óner ýnıversıtetiniń professory – Janǵalı Júzbaı.
– Dombyra – qazaqtyń jany. Ulttyq aspapty óskeleń urpaqqa úıretý hám ony arnaıy mektep baǵdarlamasyna engizý – bul ulttyq bolmysty saqtaýǵa baǵyttalǵan taǵylymy mol qadamdardyń biri dep sanaımyn. Prezıdentimiz Qasym-Jomart Toqaevtyń 2019 jyldyń 7 maýsymynda «Ulttyq dombyra kúni» merekesinde dombyrany arnaıy pán retinde mektepterge engizý kerektigi jónindegi pikiri negizinde osyndaı oı týyndap, kitap jazý isin qolǵa alǵan bolatynbyz. Bolashaq úshin paıdaly eńbek dep oılaımyn, – dedi kitap avtory.
Onlaın formatta ótken konferensııaǵa Qazaq ulttyq óner ýnıversıtetiniń prorektory, ónertaný ǵylymdarynyń doktory Toıjan Eginbaeva, Qazaqstannyń eńbek sińirgen qaıratkeri, tanymal kúıshi Janǵalı Júzbaı, Qurmanǵazy atyndaǵy Qazaq ulttyq konservatorııasy Dástúrli mýzyka fakýltetiniń dekany, ónertaný ǵylymdary Phd doktory Erjan Jámeńkeev, Nur-Sultan qalalyq memlekettik akademııalyq fılarmonııasynyń bas dırektory Erlan Dákenov, Qazaqstannyń eńbek sińirgen qaıratkeri, kompozıtor, ónertaný ǵylymdarynyń magıstri Álqýat Qazaqbaı, Nur-Sultan qalasyndaǵy oqýshylar saraıynyń bas dırektory Erbol Irgebaı, Táttimbet atyndaǵy óner kolledjiniń dırektory Serjan Musaıynov, «Qazaqkonsert» Memlekettik konserttik birlestiginiń «Halyq qazynasy» ujymynyń jetekshisi Erlan Rysqalı jáne belgili ǵalymdar, birqatar salalyq, oqý oryndary men óner salasyndaǵy uıymdardyń basshylary men ókilderi qatysty.
Aıta ketý kerek, Qazaqstan Respýblıkasynyń Prezıdenti Qasym-Jomart Kemeluly Toqaevtyń 2019 jyldyń 7 maýsymynda «Ulttyq dombyra kúni» merekesinde dombyrany arnaıy pán retinde mektepterge engizý kerektigi jónindegi pikiri jarııalanǵan bolatyn. Osyǵan oraı jalpy bilim beretin mektepterde qasıetti aspabymyzdy oqytý jumystary qarqyn alyp, «Dombyra» pánine arnalǵan oqý quralyna qajettilik týyndady.